ବିଶ୍ୱାମିତ୍ରପଃଫଲାଂ ପ୍ରିୟତରାଂ ବିପ୍ରାଲିସଂସେବିତାଂ
ନିତ୍ୟାନିତ୍ୟବିବେକଦାଂ ସ୍ମିତମୁଖୀଂ ଖଣ୍ଡେନ୍ଦୁଭୂଷୋଜ୍ଜ୍ୱଲାମ୍ ।
ତାମ୍ବୂଲାରୁଣଭାସମାନବଦନାଂ ମାର୍ତାଣ୍ଡମଧ୍ୟସ୍ଥିତାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୧ ॥
ଜାତୀପଙ୍କଜକେତକୀକୁବଲୟୈଃ ସମ୍ପୂଜିତାଙ୍ଘ୍ରିଦ୍ୱୟାଂ
ତତ୍ତ୍ୱାର୍ଥାତ୍ମିକବର୍ଣପଙ୍କ୍ତିସହିତାଂ ତତ୍ତ୍ୱାର୍ଥବୁଦ୍ଧିପ୍ରଦାମ୍ ।
ପ୍ରାଣାୟାମପରାୟଣୈର୍ବୁଧଜନୈଃ ସଂସେବ୍ୟମାନାଂ ଶିବାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୨ ॥
ମଞ୍ଜୀରଧ୍ୱନିଭିଃ ସମସ୍ତଜଗତାଂ ମଞ୍ଜୁତ୍ୱସମ୍ବର୍ଧନୀଂ
ବିପ୍ରପ୍ରେଙ୍ଖିତବାରିବାରିତମହାରକ୍ଷୋଗଣାଂ ମୃଣ୍ମୟୀମ୍ ।
ଜପ୍ତୁଃ ପାପହରାଂ ଜପାସୁମନିଭାଂ ହଂସେନ ସଂଶୋଭିତାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୩ ॥
କାଞ୍ଚୀଚେଲବିଭୂଷିତାଂ ଶିବମୟୀଂ ମାଲାର୍ଧମାଲାଦିକାନ୍
ବିଭ୍ରାଣାଂ ପରମେଶ୍ୱରୀଂ ଶରଣଦାଂ ମୋହାନ୍ଧବୁଦ୍ଧିଚ୍ଛିଦାମ୍ ।
ଭୂରାଦିତ୍ରିପୁରାଂ ତ୍ରିଲୋକଜନନୀମଧ୍ୟାତ୍ମଶାଖାନୁତାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୪ ॥
ଧ୍ୟାତୁର୍ଗର୍ଭକୃଶାନୁତାପହରଣାଂ ସାମାତ୍ମିକାଂ ସାମଗାଂ
ସାୟଙ୍କାଲସୁସେବିତାଂ ସ୍ୱରମୟୀଂ ଦୂର୍ୱାଦଲଶ୍ୟାମଲାମ୍ ।
ମାତୁର୍ଦାସ୍ୟବିଲୋଚନୈକମତିମତ୍ଖେଟୀନ୍ଦ୍ରସଂରାଜିତାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୫ ॥
ସନ୍ଧ୍ୟାରାଗବିଚିତ୍ରବସ୍ତ୍ରବିଲସଦ୍ୱିପ୍ରୋତ୍ତମୈଃ ସେବିତାଂ
ତାରାହୀରସୁମାଲିକାଂ ସୁବିଲସଦ୍ରତ୍ନେନ୍ଦୁକୁମ୍ଭାନ୍ତରାମ୍ ।
ରାକାଚନ୍ଦ୍ରମୁଖୀଂ ରମାପତିନୁତାଂ ଶଙ୍ଖାଦିଭାସ୍ୱତ୍କରାଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୬ ॥
ବେଣୀଭୂଶିତମାଲକଧ୍ୱନିକରୈର୍ଭୃଙ୍ଗୈଃ ସଦା ଶୋଭିତାଂ
ତତ୍ତ୍ୱଜ୍ଞାନରସାୟନଜ୍ଞରସନାସୌଧଭ୍ରମଦ୍ଭ୍ରାମରୀମ୍ ।
ନାସାଲଙ୍କୃତମୌକ୍ତିକେନ୍ଦୁକିରଣୈଃ ସାୟନ୍ତମଶ୍ଛେଦିନୀଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୭ ॥
ପାଦାବ୍ଜାନ୍ତରରେଣୁକୁଙ୍କୁମଲସତ୍ଫାଲଦ୍ୟୁରାମାବୃତାଂ
ରମ୍ଭାନାଟ୍ୟବିଲୋକନୈକରସିକାଂ ବେଦାନ୍ତବୁଦ୍ଧିପ୍ରଦାମ୍ ।
ବୀଣାବେଣୁମୃଦଙ୍ଗକାହଲରବାନ୍ ଦେବୈଃ କୃତାଞ୍ଛୃଣ୍ୱତୀଂ
ଗାୟତ୍ରୀଂ ହରିବଲ୍ଲଭାଂ ତ୍ରିନୟନାଂ ଧ୍ୟାୟାମି ପଞ୍ଚାନନାମ୍ ॥ ୮ ॥
ହତ୍ୟାପାନସୁବର୍ଣତସ୍କରମହାଗୁର୍ୱଙ୍ଗନାସଙ୍ଗମାନ୍
ଦୋଷାଞ୍ଛୈଲସମାନ୍ ପୁରନ୍ଦରସମାଃ ସଞ୍ଚ୍ଛିଦ୍ୟ ସୂର୍ୟୋପମାଃ ।
ଗାୟତ୍ରୀଂ ଶ୍ରୁତିମାତୁରେକମନସା ସନ୍ଧ୍ୟାସୁ ଯେ ଭୂସୁରା
ଜପ୍ତ୍ୱା ଯାନ୍ତି ପରାଂ ଗତିଂ ମନୁମିମଂ ଦେବ୍ୟାଃ ପରଂ ବୈଦିକାଃ ॥ ୯ ॥
ଇତି ଶ୍ରୀମତ୍ପରମହଂସପରିବ୍ରାଜକାଚାର୍ୟ
ଶ୍ରୀମଚ୍ଛଙ୍କରାଚାର୍ୟବିରଚିତଂ ଗାୟତ୍ର୍ୟଷ୍ଟକଂ ସମ୍ପୂର୍ଣମ୍ ।
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଗାୟତ୍ରୀ ଅଷ୍ଟକମ୍ ବା ସ୍ତୋତ୍ରମ୍ https://gayatree-upasana.blogspot.com/2022/10/blog-post_20.html
No comments:
Post a Comment