ଓଁକାରରୂପା ତ୍ରିପଦା ତ୍ରୟୀ ଚ ତ୍ରିଦେବବନ୍ଦ୍ୟା ତ୍ରିଦିବାଧିଦେବୀ ।
ତ୍ରିଲୋକକର୍ତ୍ରୀ ତ୍ରିତୟସ୍ୟ ଭର୍ତ୍ରୀ ତ୍ରୈକାଲିକୀ ସଙ୍କଲନାବିଧାତ୍ରୀ ॥ ୧॥
ତ୍ରୈଗୁଣ୍ୟଭେଦାତ୍ ତ୍ରିବିଧସ୍ୱରୂପା ତ୍ରୈବିଧ୍ୟଯୁକ୍ତସ୍ୟ ଫଲସ୍ୟ ଦାତ୍ରୀ ।
ତଥାପବର୍ଗସ୍ୟ ବିଧାୟିନୀ ତ୍ୱଂ ଦୟାର୍ଦ୍ରଦୃକ୍କୋଣବିଲୋକନେନ ॥ ୨॥
ତ୍ୱଂ ବାଙ୍ମୟୀ ବିଶ୍ୱବଦାନ୍ୟମୂର୍ତିର୍ୱିଶ୍ୱସ୍ୱରୂପାପି ହି ବିଶ୍ୱଗର୍ଭା ।
ତତ୍ତ୍ୱାତ୍ମିକା ତତ୍ତ୍ୱପରାତ୍ପରା ଚ ଦୃକ୍ତାରିକା ତାରକଶଙ୍କରସ୍ୟ ॥ ୩॥
ବିଶ୍ୱାତ୍ମିକେ ବିଶ୍ୱବିଲାସଭୂତେ ବିଶ୍ୱାଶ୍ରୟେ ବିଶ୍ୱବିକାଶଧାମେ ।
ବିଭୂତ୍ୟଧିଷ୍ଠାତ୍ରି ବିଭୂତିଦାତ୍ରି ପଦେ ତ୍ୱଦୀୟେ ପ୍ରଣତିର୍ମଦୀୟା ॥ ୪॥
ଭୋଗସ୍ୟ ଭୋକ୍ତ୍ରୀ କରଣସ୍ୟ କର୍ତ୍ରୀ ଧାତ୍ୱାବ୍ୟଯପ୍ରତ୍ୟଯଲିଙ୍ଗଶୂନ୍ୟା ।
ଜ୍ଞେୟା ନ ବେଦୈର୍ନ ପୁରାଣଭେଦୈର୍ଧ୍ୟେୟା ଧିୟା ଧାରଣୟାଦିଶକ୍ତିଃ ॥ ୫॥
ନିତ୍ୟା ସଦା ସର୍ୱଗତାଽପ୍ୟଲକ୍ଷ୍ୟା ବିଷ୍ଣୋର୍ୱିଧେଃ ଶଙ୍କରତୋଽପ୍ୟଭିନ୍ନା ।
ଶକ୍ତିସ୍ୱରୂପା ଜଗତୋଽସ୍ୟ ଶକ୍ତିର୍ଜ୍ଞାତୁଂ ନ ଶକ୍ୟା କରଣାଦିଭିସ୍ତ୍ୱମ୍ ॥ ୬॥
ତ୍ୟକ୍ତସ୍ତ୍ୱୟାତ୍ୟନ୍ତନିରସ୍ତବୁଦ୍ଧିର୍ନରୋ ଭବେଦ୍ ବୈଭବଭାଗ୍ୟହୀନଃ ।
ହିମାଲୟାଦପ୍ୟଧିକୋତ୍ରତୋଽପି ଜନୈସ୍ସମସ୍ତୈରପି ଲଙ୍ଘନୀୟଃ ॥ ୭॥
ଶିବେ ହରୌ ବ୍ରହ୍ମଣି ଭାନୁଚନ୍ଦ୍ରୟୋଶ୍ଚରାଚରେ ଗୋଚରକେଽପ୍ୟଗୋଚରେ ।
ସୂକ୍ଷ୍ମାତିସୂକ୍ଷ୍ମେ ମହତୋ ମହତ୍ତମେ କଲା ତ୍ୱଦୀୟା ବିମଲା ବିରାଜତେ ॥ ୮॥
ସୁଧାମରନ୍ଦଂ ତବ ପାଦପଦ୍ମଂ ସ୍ୱେ ମାନସେ ଧାରଣୟା ନିଧାୟ ।
ବୁଦ୍ଧିର୍ମିଲିନ୍ଦୀଭବତାନ୍ମଦୀୟା ନାତଃ ପରଂ ଦେବି ବରଂ ସମୀହେ ॥ ୯॥
ଦୀନେଷୁ ହୀନେଷୁ ଗତାଦରେଷୁ ସ୍ୱାଭାବିକୀ ତେ କରୁଣା ପ୍ରସିଦ୍ଧା ।
ଅତଃ ଶରଣ୍ୟେ ଶରଣଂ ପ୍ରପନ୍ନଂ ଗୃହାଣ ମାତଃ ପ୍ରଣୟାଞ୍ଜଲିଂ ମେ ॥ ୧୦॥
॥ ଇତି ଗାୟତ୍ରୀବନ୍ଦନା ସମାପ୍ତା ॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଗାୟତ୍ରୀ ଲହରୀ https://gayatree-upasana.blogspot.com/2022/10/blog-post_55.html
No comments:
Post a Comment