ଶ୍ରୀଗଣେଶାୟ ନମଃ ॥
ଭଗବନ୍ତଂ ଦେବଦେବଂ ବ୍ରହ୍ମାଣଂ ପରମେଷ୍ଠିନମ୍ ।
ବିଧାତାରଂ ବିଶ୍ୱସୃଜଂ ପଦ୍ମୟୋନିଂ ପ୍ରଜାପତିମ୍ ॥ ୧॥
ଶୁଦ୍ଧସ୍ଫଟିକସଙ୍କାଶଂ ମହେନ୍ଦ୍ରଶିଖରୋପମମ୍ ।
ବଦ୍ଧପିଙ୍ଗଜଟାଜୂଟଂ ତଡିତ୍କନକକୁଣ୍ଡଲମ୍ ॥ ୨॥
ଶରଚ୍ଚନ୍ଦ୍ରାଭବଦନଂ ସ୍ଫୁରଦିନ୍ଦୀବରେକ୍ଷଣମ୍ ।
ହିରଣ୍ମୟଂ ବିଶ୍ୱରୂପମୁପବୀତାଜିନାବୃତମ୍ ॥ ୩॥
ମୌକ୍ତିକାଭାକ୍ଷବଲୟସ୍ତନ୍ତ୍ରୀଲୟସମନ୍ୱିତଃ ।
କର୍ପୂରୋଦ୍ଧୂଲିତତନୁଃ ସ୍ରଷ୍ଟୁର୍ନୟନବର୍ଧନମ୍ ॥ ୪॥
ବିନୟେନୋପସଙ୍ଗମ୍ୟ ଶିରସା ପ୍ରଣିପତ୍ୟ ଚ ।
ନାରଦଃ ପରିପପ୍ରଚ୍ଛ ଦେବର୍ଷିଗଣମଧ୍ୟଗଃ ॥ ୫॥
ନାରଦ ଉବାଚ ।
ଭଗବନ୍ ଦେବଦେବେଶ ସର୍ୱଜ୍ଞ କରୁଣାନିଧେ ।
ଶ୍ରୋତୁମିଚ୍ଛାମି ପ୍ରଶ୍ନେନ ଭୋଗମୋକ୍ଷୈକସାଧନମ୍ ॥ ୬॥
ଐଶ୍ୱର୍ୟସ୍ୟ ସମଗ୍ରସ୍ୟ ଫଲଦଂ ଦ୍ୱନ୍ଦ୍ୱବର୍ଜିତମ୍ ।
ବ୍ରହ୍ମହତ୍ୟାଦିପାପଘ୍ନଂ ପାପାଦ୍ୟରିଭୟାପହମ୍ ॥ ୭॥
ଯଦେକଂ ନିଷ୍କଲଂ ସୂକ୍ଷ୍ମଂ ନିରଞ୍ଜନମନାମୟମ୍ ।
ଯତ୍ତେ ପ୍ରିୟତମଂ ଲୋକେ ତନ୍ମେ ବ୍ରୂହି ପିତର୍ମମ ॥ ୮॥
ବ୍ରହ୍ମୋବାଚ ।
ଶୃଣୁ ନାରଦ ବକ୍ଷ୍ୟମି ବ୍ରହ୍ମମୂଲଂ ସନାତନମ୍ ।
ସୃଷ୍ଟ୍ୟାଦୌ ମନ୍ମୁଖେ କ୍ଷିପ୍ତଂ ଦେବଦେବେନ ବିଷ୍ଣୁନା ॥ ୯॥
ପ୍ରପଞ୍ଚବୀଜମିତ୍ୟାହୁରୁତ୍ପତ୍ତିସ୍ଥିତିହେତୁକମ୍ ।
ପୁରା ମୟା ତୁ କଥିତଂ କଶ୍ୟପାୟ ସୁଧୀମତେ ॥ ୧୦॥
ସାବିତ୍ରୀପଞ୍ଜରଂ ନାମ ରହସ୍ୟଂ ନିଗମତ୍ରୟେ ।
ଋଷ୍ୟାଦିକଂ ଚ ଦିଗ୍ୱର୍ଣଂ ସାଙ୍ଗାବରଣକଂ କ୍ରମାତ୍ ॥ ୧୧॥
ବାହନାୟୁଧମନ୍ତ୍ରାସ୍ତ୍ରଂ ମୂର୍ତିଧ୍ୟାନସମନ୍ୱିତମ୍ ।
ସ୍ତୋତ୍ରଂ ଶୃଣୁ ପ୍ରବକ୍ଷ୍ୟାମି ତବ ସ୍ନେହାଚ୍ଚ ନାରଦ ॥ ୧୨॥
ବ୍ରହ୍ମନିଷ୍ଠାୟ ଦେୟଂ ସ୍ୟାଦଦେୟଂ ଯସ୍ୟ କସ୍ୟଚିତ୍ ।
ଆଚମ୍ୟ ନିୟତଃ ପଶ୍ଚାଦାତ୍ମଧ୍ୟାନପୁରଃସରମ୍ ॥ ୧୩॥
ଓମିତ୍ୟାଦୌ ବିଚିନ୍ତ୍ୟାଥ ବ୍ୟୋମହୈମାବ୍ଜସଂସ୍ଥିତମ୍ ।
ଧର୍ମକନ୍ଦଗତଜ୍ଞାନମୈଶ୍ୱର୍ୟାଷ୍ଟଦଲାନ୍ୱିତମ୍ ॥ ୧୪॥
ବୈରାଗ୍ୟକର୍ଣିକାଽଽସୀନାଂ ପ୍ରଣବଗ୍ରହମଧ୍ୟଗାମ୍ ।
ବ୍ରହ୍ମବେଦିସମାୟୁକ୍ତାଂ ଚୈତନ୍ୟପୁରମଧ୍ୟଗାମ୍ ॥ ୧୫॥
ତତ୍ତ୍ୱହଂସସମାକୀର୍ଣାଂ ଶବ୍ଦପୀଠେ ସୁସଂସ୍ଥିତାମ୍ ।
ନାଦବିନ୍ଦୁକଲାତୀତାଂ ଗୋପୁରୈରୁପଶୋଭିତାମ୍ ॥ ୧୬॥
ବିଦ୍ୟାବିଦ୍ୟାମୃତତ୍ୱାଦିପ୍ରକାରୈରଭିସମ୍ବୃତାମ୍ ।
ନିଗମାର୍ଗଲସଞ୍ଚ୍ଛନ୍ନାଂ ନିର୍ଗୁଣଦ୍ୱାରବାଟିକାମ୍ ॥ ୧୭॥
ଚତୁର୍ୱର୍ଗଫଲୋପେତାଂ ମହାକଲ୍ପବନୈବୃତାମ୍ ।
ସାଦ୍ରାନନ୍ଦସୁଧାସିନ୍ଧୁନିଗମଦ୍ୱାରବାଟିକାମ୍ ॥ ୧୮॥
ଧ୍ୟାନଧାରଣୟୋଗାଦିତୃଣଗୁଲ୍ମଲତାବୃତାମ୍ ।
ସଦସଚ୍ଚିତ୍ସ୍ୱରୂପାଖ୍ୟାଂ ମୃଗପକ୍ଷିସମାକୁଲାମ୍ ।
ବିଦ୍ୟାବିଦ୍ୟାବିଚାରତ୍ୱାଲ୍ଲୋକାଲୋକାଚଲାବୃତାମ୍ ॥ ୧୯॥
ଅବିକାରସମାଶ୍ଲିଷ୍ଟନିଜଧ୍ୟାନଗୁଣାବୃତାମ୍ ।
ପଞ୍ଚୀକରଣପଞ୍ଚୋତ୍ଥଭୂତତତ୍ତ୍ୱନିବେଦିତାମ୍ ॥ ୨୦॥
ବେଦୋପନିଷଦର୍ଥାଖ୍ୟଦେବର୍ଷିଗଣସେବିତାମ୍ ।
ଇତିହାସଗ୍ରହଗଣୈଃ ସଦାରୈରଭିବନ୍ଦିତାମ୍ ॥ ୨୧॥
ଗାଥାପ୍ସରୋଭିର୍ୟକ୍ଷୈଶ୍ଚ ଗଣକିନ୍ନରସେବିତାମ୍ ।
ନାରସିଂହପୁରାଣାଖ୍ୟୈଃ ପୁରୁଷୈଃ କଲ୍ପଚାରଣୈଃ ॥ ୨୨॥
କୃତଗାନବିନୋଦାଦିକଥାଲାପନତତ୍ପରାମ୍ ।
ତଦିତ୍ୟବାଙ୍ମନୋଗମ୍ୟତେଜୋରୂପଧରାଂ ପରାମ୍ ॥ ୨୩॥
ଜଗତଃ ପ୍ରସବିତ୍ରୀଂ ତାଂ ସବିତୁଃ ସୃଷ୍ଟିକାରିଣୀମ୍ ।
ବରେଣ୍ୟମିତ୍ୟନ୍ନମୟୀଂ ପୁରୁଷାର୍ଥଫଲପ୍ରଦାମ୍ ॥ ୨୪॥
ଅବିଦ୍ୟାବର୍ଣବର୍ଜ୍ୟାଂ ଚ ତେଜୋବଦ୍ଗର୍ଭସଞ୍ଜ୍ଞିକାମ୍ ।
ଦେବସ୍ୟ ସଚ୍ଚିଦାନନ୍ଦପରବ୍ରହ୍ମରସାତ୍ମିକାମ୍ ॥ ୨୫॥
ଧୀମହ୍ୟହଂ ସ ବୈ ତଦ୍ୱଦ୍ବ୍ରହ୍ମାଦ୍ୱୈତସ୍ୱରୂପିଣୀମ୍ ।
ଧିୟୋ ଯୋ ନସ୍ତୁ ସବିତା ପ୍ରଚୋଦୟାଦୁପାସିତାମ୍ ॥ ୨୬॥
ପରୋଽସୌ ସବିତା ସାକ୍ଷାଦେନୋନିର୍ହରଣାୟ ଚ ।
ପରୋ ରଜସ ଇତ୍ୟାଦି ପରଂ ବ୍ରହ୍ମ ସନାତନମ୍ ॥ ୨୭॥
ଆପୋ ଜ୍ୟୋତିରିତି ଦ୍ୱାଭ୍ୟାଂ ପାଞ୍ଚଭୌତିକସଞ୍ଜ୍ଞକମ୍ ।
ରସୋଽମୃତଂ ବ୍ରହ୍ମପଦୈସ୍ତାଂ ନିତ୍ୟାଂ ତପିନୀଂ ପରାମ୍ ॥ ୨୮॥
ଭୂର୍ଭୁବଃସୁବରିତ୍ୟେତୈର୍ନିଗମତ୍ୱପ୍ରକାଶିକାମ୍ ।
ମହର୍ଜନସ୍ତପଃସତ୍ୟଲୋକୋପରିସୁସଂସ୍ଥିତାମ୍ ॥ ୨୯॥
ତାଦୃଗସ୍ୟା ବିରାଡ୍ରୂପକିରୀଟବରରାଜିତାମ୍ ।
ବ୍ୟୋମକେଶାଲକାକାଶରହସ୍ୟଂ ପ୍ରବଦାମ୍ୟହମ୍ ॥ ୩୦॥
ମେଘଭ୍ରୁକୁଟିକାକ୍ରାନ୍ତବିଧିବିଷ୍ଣୁଶିବାର୍ଚିତାମ୍ ।
ଗୁରୁଭାର୍ଗବକର୍ଣାନ୍ତାଂ ସୋମସୂର୍ୟାଗ୍ନିଲୋଚନାମ୍ ॥ ୩୧॥
ଇଡାପିଙ୍ଗଲସୂକ୍ଷ୍ମାଭ୍ୟାଂ ବାୟୁନାସାପୁଟାନ୍ୱିତାମ୍ ।
ସନ୍ଧ୍ୟାଦ୍ୱିରୋଷ୍ଠପୁଟିତାଂ ଲସଦ୍ୱାଗ୍ଭୂପଜିହ୍ୱିକାମ୍ ॥ ୩୨॥
ସନ୍ଧ୍ୟାସୌ ଦ୍ୟୁମଣେଃ କଣ୍ଠଲସଦ୍ବାହୁସମନ୍ୱିତାମ୍ ।
ପର୍ଜନ୍ୟହୃଦୟାସକ୍ତବସୁସୁସ୍ତନମଣ୍ଡଲାମ୍ ॥ ୩୩॥
ଆକାଶୋଦରବିତ୍ରସ୍ତନାଭ୍ୟବାନ୍ତରଦେଶକାମ୍ ।
ପ୍ରଜାପତ୍ୟାଖ୍ୟଜଘନାଂ କଟୀନ୍ଦ୍ରାଣୀତି ସଞ୍ଜ୍ଞିକାମ୍ ॥ ୩୪॥
ଊରୂ ମଲୟମେରୁଭ୍ୟାଂ ଶୋଭମାନାସୁରଦ୍ୱିଷମ୍ ।
ଜାନୁନୀ ଜହ୍ନୁକୁଶିକବୈଶ୍ୱଦେବସଦାଭୁଜାମ୍ ॥ ୩୫॥
ଅୟନଦ୍ୱୟଜଙ୍ଘାଦ୍ୟଖୁରାଦ୍ୟପିତୃସଞ୍ଜ୍ଞିକାମ୍ ।
ପଦାଙ୍ଘ୍ରିନଖରୋମାଦ୍ୟଭୂତଲଦ୍ରୁମଲାଞ୍ଛିତାମ୍ ॥ ୩୬॥
ଗ୍ରହରାଶ୍ୟୃକ୍ଷଦେବର୍ଷିମୂର୍ତିଂ ଚ ପରସଞ୍ଜ୍ଞିକାମ୍ ।
ତିଥିମାସର୍ତୁବର୍ଷାଖ୍ୟସୁକେତୁନିମିଷାତ୍ମିକାମ୍ ॥ ୩୭॥
ଅହୋରାତ୍ରାର୍ଧମାସାଖ୍ୟାଂ ସୂର୍ୟାଚନ୍ଦ୍ରମସାତ୍ମିକାମ୍ ।
ମାୟାକଲ୍ପିତବୈଚିତ୍ର୍ୟସନ୍ଧ୍ୟାଚ୍ଛାଦନସମ୍ବୃତାମ୍ ॥ ୩୮॥
ଜ୍ୱଲତ୍କାଲାନଲପ୍ରଖ୍ୟାଂ ତଡିତ୍କୋଟିସମପ୍ରଭାମ୍ ।
କୋଟିସୂର୍ୟପ୍ରତୀକାଶାଂ ଚନ୍ଦ୍ରକୋଟିସୁଶୀତଲାମ୍ ॥ ୩୯॥
ସୁଧାମଣ୍ଡଲମଧ୍ୟସ୍ଥାଂ ସାନ୍ଦ୍ରାନନ୍ଦାମୃତାତ୍ମିକାମ୍ ।
ପ୍ରାଗତୀତାଂ ମନୋରମ୍ୟାଂ ବରଦାଂ ବେଦମାତରମ୍ ॥ ୪୦॥
ଚରାଚରମୟୀଂ ନିତ୍ୟାଂ ବ୍ରହ୍ମାକ୍ଷରସମନ୍ୱିତାମ୍ ।
ଧ୍ୟାତ୍ୱା ସ୍ୱାତ୍ମନି ଭେଦେନ ବ୍ରହ୍ମପଞ୍ଜରମାରଭେତ୍ ॥ ୪୧॥
ପଞ୍ଜରସ୍ୟ ଋଷିଶ୍ଚାହଂ ଛନ୍ଦୋ ବିକୃତିରୁଚ୍ୟତେ ।
ଦେବତା ଚ ପରୋ ହଂସଃ ପରବ୍ରହ୍ମାଧିଦେବତା ॥ ୪୨॥
ପ୍ରଣବୋ ବୀଜଶକ୍ତିଃ ସ୍ୟାଦୋଂ କୀଲକମୁଦାହୃତମ୍ ।
ତତ୍ତତ୍ତ୍ୱଂ ଧୀମହି କ୍ଷେତ୍ରଂ ଧିୟୋଽସ୍ତ୍ରଂ ଯଃ ପରଂ ପଦମ୍ ॥ ୪୩॥
ମନ୍ତ୍ରମାପୋ ଜ୍ୟୋତିରିତି ଯୋନିର୍ହଂସଃ ସବନ୍ଧକମ୍ ।
ବିନିୟୋଗସ୍ତୁ ସିଦ୍ଧ୍ୟର୍ଥଂ ପୁରୁଷାର୍ଥଚତୁଷ୍ଟୟେ ॥ ୪୪॥
ତତସ୍ତୈରଙ୍ଗଷଟ୍କଂ ସ୍ୟାତ୍ତୈରେବ ବ୍ୟାପକତ୍ରୟମ୍ ।
ପୂର୍ୱୋକ୍ତଦେବତାଂ ଧ୍ୟାୟେତ୍ ସାକାରଗୁଣସଂୟୁତାମ୍ ॥ ୪୫॥
ପଞ୍ଚବକ୍ତ୍ରାଂ ଦଶଭୁଜାଂ ତ୍ରିପଞ୍ଚନୟନୈର୍ୟୁତାମ୍ ।
ମୁକ୍ତାବିଦ୍ରୁମସୌବର୍ଣାଂ ସିତଶୁଭ୍ରସମାନନାମ୍ ॥ ୪୬॥
ବାଣୀଂ ପରାଂ ରମାଂ ମାୟାଂ ଚାମରୈର୍ଦର୍ପଣୈର୍ୟୁତାମ୍ ।
ଷଡଙ୍ଗଦେବତାମନ୍ତ୍ରୈ ରୂପାଦ୍ୟବୟବାତ୍ମିକାମ୍ ॥ ୪୭॥
ମୃଗେନ୍ଦ୍ରମୃଗପକ୍ଷୀନ୍ଦ୍ରମୃଗହଂସାସନେ ସ୍ଥିତାମ୍ ।
ଅର୍ଧେନ୍ଦୁବଦ୍ଧମୁକୁଟକିରୀଟମଣିକୁଣ୍ଡଲାମ୍ ॥ ୪୮॥
ରତ୍ନତାଟଙ୍କମାଙ୍ଗଲ୍ୟପରଗ୍ରୈବେୟନୂପୁରାମ୍ ।
ଅଙ୍ଗୁଲୀୟକକେୟୂରକଙ୍କଣାଦ୍ୟୈରଲଙ୍କୃତାମ୍ ॥ ୪୯॥
ଦିବ୍ୟସ୍ରଗ୍ୱସ୍ତ୍ରସଞ୍ଚ୍ଛନ୍ନରବିମଣ୍ଡଲମଧ୍ୟଗାମ୍ ।
ବରାଭୟାବ୍ଜୟୁଗଲାଂ ଶଙ୍ଖଚକ୍ରଗଦାଙ୍କୁଶାନ୍ ॥ ୫୦॥
ଶୁଭ୍ରଂ କପାଲଂ ଦଧତୀଂ ବହନ୍ତୀମକ୍ଷମାଲିକାମ୍ ।
ଗାୟତ୍ରୀଂ ବରଦାଂ ଦେବୀଂ ସାବିତ୍ରୀଂ ବେଦମାତରମ୍ ॥ ୫୧॥
ଆଦିତ୍ୟପଥଗାମିନ୍ୟାଂ ସ୍ମରେଦ୍ବ୍ରହ୍ମସ୍ୱରୂପିଣୀମ୍ ।
ବିଚିତ୍ରମନ୍ତ୍ରଜନର୍ନୀଂ ସ୍ମରେଦ୍ୱିଦ୍ୟାଂ ସରସ୍ୱତୀମ୍ ॥ ୫୨॥
ତ୍ରିପଦା ଋହ୍ମୟୀ ପୂର୍ୱାମୁଖୀ ବ୍ରହ୍ମାସ୍ତ୍ରସଞ୍ଜ୍ଞିକା ।
ଚତୁର୍ୱିଂଶତିତତ୍ତ୍ୱାଖ୍ୟା ପାତୁ ପ୍ରାଚୀଂ ଦିଶଂ ମମ ॥ ୫୩॥
ଚତୁଷ୍ପାଦୟଜୁର୍ବ୍ରହ୍ମଦଣ୍ଡାଖ୍ୟା ପାତୁ ଦକ୍ଷିଣାମ୍ ।
ଷଟ୍ତ୍ରିଶତ୍ତତ୍ତ୍ୱୟୁକ୍ତା ସା ପାତୁ ମେ ଦକ୍ଷିଣାଂ ଦିଶମ୍ ॥ ୫୪॥
ପ୍ରତ୍ୟଙ୍ମୁଖୀ ପଞ୍ଚପଦୀ ପଞ୍ଚାଶତ୍ତତ୍ତ୍ୱରୂପିଣୀ ।
ପାତୁ ପ୍ରତୀଚୀମନିଶଂ ସାମବ୍ରହ୍ମଶିରୋଽଙ୍କିତା ॥ ୫୫॥
ସୌମ୍ୟା ବ୍ରହ୍ମସ୍ୱରୂପାଖ୍ୟା ସାଥର୍ୱାଙ୍ଗିରସାତ୍ମିକା ।
ଉଦୀଚୀଂ ଷଟ୍ପଦା ପାତୁ ଚତୁଃଷଷ୍ଟିକଲାତ୍ମିକା ॥ ୫୬॥
ପଞ୍ଚାଶତ୍ତତ୍ତ୍ୱରଚିତା ଭବପାଦା ଶତାକ୍ଷରୀ ।
ବ୍ୟୋମାଖ୍ୟା ପାତୁ ମେ ଚୋର୍ଧ୍ୱାଂ ଦିଶଂ ବେଦାଙ୍ଗସଂସ୍ଥିତା ॥ ୫୭॥
ବିଦ୍ୟୁନ୍ନିଭା ବ୍ରହ୍ମସଞ୍ଜ୍ଞା ମୃଗାରୂଢା ଚତୁର୍ଭୁଜା ।
ଚାପେଷୁଚର୍ମାସିଧରା ପାତୁ ମେ ପାବକୀଂ ଦିଶମ୍ ॥ ୫୮॥
ବ୍ରାହ୍ମୀ କୁମାରୀ ଗାୟତ୍ରୀ ରକ୍ତାଙ୍ଗୀ ହଂସବାହିନୀ ।
ବିଭ୍ରତ୍କମଣ୍ଡଲ୍ୱକ୍ଷସ୍ରକ୍ସ୍ତ୍ରୁବାନ୍ମେ ପାତୁ ନୈରୃତୀମ୍ ॥ ୫୯॥
ଚତୁର୍ଭୁଜା ବେଦମାତା ଶୁକ୍ଲାଙ୍ଗୀ ବୃଷବାହିନୀ ।
ବରାଭୟକପାଲାକ୍ଷସ୍ରଗ୍ୱିଣୀ ପାତୁ ବାରୁଣୀମ୍ ॥ ୬୦॥
ଶ୍ୟାମା ସରସ୍ୱତୀ ବୃଦ୍ଧା ବୈଷ୍ଣବୀ ଗରୁଡାସନା ।
ଶଙ୍ଖାରାବ୍ଜାଭୟକରା ପାତୁ ଶୈବୀଂ ଦିଶଂ ମମ ॥ ୬୧॥
ଚତୁର୍ଭୁଜା ବେଦମାତା ଗୌରାଙ୍ଗୀ ସିଂହବାହନା ।
ବରାଭୟାବ୍ଜୟୁଗଲୈର୍ଭୁଜୈଃ ପାତ୍ୱଧରାଂ ଦିଶମ୍ ॥ ୬୨॥
ତତ୍ତତ୍ପାର୍ଶ୍ୱସ୍ଥିତାଃ ସ୍ୱସ୍ୱବାହନାୟୁଧଭୂଷଣାଃ ।
ସ୍ୱସ୍ୱଦିକ୍ଷୁ ସ୍ଥିତାଃ ପାନ୍ତୁ ଗ୍ରହଶକ୍ତ୍ୟଙ୍ଗଦେବତାଃ ॥ ୬୩॥
ମନ୍ତ୍ରାଧିଦେବତାରୂପା ମୁଦ୍ରାଧିଷ୍ଠାନ ଦେବତା ।
ବ୍ୟାପକତ୍ୱେନ ପାତ୍ୱସ୍ମାନାପହୃତ୍ତଲମସ୍ତକୀ ॥ ୬୪॥
ତତ୍ପଦଂ ମେ ଶିରଃ ପାତୁ ଭାଲଂ ମେ ସବିତୁଃପଦମ୍ ।
ବରେଣ୍ୟଂ ମେ ଦୃଶୌ ପାତୁ ଶ୍ରୁତୀର୍ଭଗଃ ସଦା ମମ ॥ ୬୫॥
ଘ୍ରାଣଂ ଦେବସ୍ୟ ମେ ପାତୁ ପାତୁ ଧୀମହି ମେ ମୁଖମ୍ ।
ଜିହ୍ୱା ମମ ଧିୟଃ ପାତୁ କଣ୍ଠଂ ମେ ପାତୁ ଯଃପଦମ୍ ॥ ୬୬॥
ନଃପଦଂ ପାତୁ ମେ ସ୍କନ୍ଧୌ ଭୁଜୌ ପାତୁ ପ୍ରଚୋଦୟାତ୍ ।
କରୌ ମେ ଚ ପରଃ ପାତୁ ପାଦୌ ମେ ରଜସେଽବତୁ ॥ ୬୭॥
ଅସୌ ମେ ହୃଦୟଂ ପାତୁ ମମ ମଧ୍ୟଂ ସଦାବତୁ ।
ଓଁ ମେ ନାଭିଂ ସଦା ପାତୁ କଟିଂ ମେ ପାତୁ ମେ ସଦା ।
ଓମାପଃ ସକ୍ଥିନୀ ପାତୁ ଗୁହ୍ୟଂ ଜ୍ୟୋତିଃ ସଦା ମମ ॥ ୬୮॥
ଊରୂ ମମ ରସଃ ପାତୁ ଜାନୁନୀ ଅମୃତଂ ମମ ।
ଜଙ୍ଘେ ବ୍ରହ୍ମପଦଂ ପାତୁ ଗୁଲ୍ଫୌ ଭୂଃ ପାତୁ ମେ ସଦା ॥ ୬୯॥
ପାଦୌ ମମ ଭୁବଃ ପାତୁ ସୁବଃ ପାତ୍ୱଖିଲଂ ବପୁଃ ।
ରୋମାଣି ମେ ମହଃ ପାତୁ ରୋମକଂ ପାତୁ ମେ ଜନଃ ॥ ୭୦॥
ପ୍ରାଣାଂଶ୍ଚ ଧାତୁତତ୍ତ୍ୱାନି ତଦୀଶଃ ପାତୁ ମେ ତପଃ ।
ସତ୍ୟଂ ପାତୁ ମମାୟୂଂଷି ହଂସୋ ଶୁଦ୍ଧିଂ ଚ ପାତୁ ମେ ॥ ୭୧॥
ଶୁଚିବତ୍ ପାତୁ ମେ ଶୁକ୍ରଂ ବସୁଃ ପାତୁ ଶ୍ରିୟଂ ମମ ।
ମତିଂ ପାତ୍ୱନ୍ତରିକ୍ଷଂ ସଦ୍ଧୋତା ଦାନଂ ଚ ପାତୁ ମେ ॥ ୭୨॥
ବେଦିଷତ୍ ପାତୁ ମେ ବିଦ୍ୟାମତିଥିଃ ପାତୁ ମେ ଗୃହମ୍ ।
ଧର୍ମଂ ଦୁରୋଣସତ୍ ପାତୁ ନୃଷତ୍ ପାତୁ ସୁତାନ୍ମମ ॥ ୭୩॥
ବରସତ୍ ପାତୁ ମେ ଭାର୍ୟାଂ ମୃତସତ୍ ପାତୁ ମେ ସୁତାନ୍ ।
ବ୍ୟୋମସତ୍ପାତୁ ମେ ବନ୍ଧୂନ୍ ଭ୍ରାତୄନବ୍ଜାଶ୍ଚ ପାତୁ ମେ ॥ ୭୪॥
ପଶୂନ୍ମେ ପାତୁ ଗୋଜାଶ୍ଚ ଋତଜାଃ ପାତୁ ମେ ଭବମ୍ ।
ସର୍ୱଂ ମେ ଅଦ୍ରିଜାଃ ପାତୁ ଯାନଂ ମେ ପାତ୍ୱୃତଂ ସଦା ॥ ୭୫॥
ଅନୁକ୍ତମଥ ଯତ୍ସ୍ଥାନଂ ଶରୀରେଽନ୍ତର୍ବହିଶ୍ଚ ଯତ୍ ।
ତତ୍ସର୍ୱଂ ପାତୁ ମେ ନିତ୍ୟଂ ହଂସଃ ସୋଽହମହର୍ନିଶମ୍ ॥ ୭୬॥
ଇଦଂ ତୁ କଥିତଂ ସମ୍ୟଙ୍ ମୟା ତେ ବ୍ରହ୍ମପଞ୍ଜରମ୍ ।
ସନ୍ଧ୍ୟଯୋଃ ପ୍ରତ୍ୟହଂ ଭକ୍ତ୍ୟା ଜପକାଲେ ବିଶେଷତଃ ॥ ୭୭॥
ଧାରୟେଦ୍ଦ୍ୱିଜବର୍ୟୋ ଯଃ ଶ୍ରାବୟେଦ୍ୱା ସମାହିତଃ ।
ସ ବିଷ୍ଣୁଃ ସ ଶିବଃ ସୋଽହଂ ସୋଽକ୍ଷରଃ ସ ବିରାଟ୍ ସ୍ୱରାଟ୍ ॥ ୭୮॥
ଇତି ବସିଷ୍ଠସଂହିତାୟାଂ ବ୍ରହ୍ମନାରଦସମ୍ବାଦେ ସାବିତ୍ରୀପଞ୍ଜରସ୍ତୋତ୍ରଂ
ଅଥବା ଗାୟତ୍ରୀପଞ୍ଜରସ୍ତୋତ୍ରଂ ସମ୍ପୂର୍ଣମ୍ ॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଗାୟତ୍ରୀହୃଦୟମ୍ https://gayatree-upasana.blogspot.com/2022/10/blog-post_51.html
No comments:
Post a Comment