ଶ୍ରୀଗଣେଶାୟ ନମଃ ॥
ଅସ୍ୟ ଶ୍ରୀଗାୟତ୍ରୀସ୍ତବରାଜସ୍ତୋତ୍ରମନ୍ତ୍ରସ୍ୟ ବିଶ୍ୱାମିତ୍ରଃ ଋଷିଃ,
ସକଲଜନନୀ ଚତୁଷ୍ପଦା ଗାୟତ୍ରୀ,ପରମାତ୍ମା ଦେବତା,
ସର୍ୱୋତ୍କୃଷ୍ଟପରଂ ଧାମ ପ୍ରଥମପାଦୋ ବୀଜଂ, ଦ୍ୱିତୀୟଃ ଶକ୍ତିଃ, ତୃତୀୟଃ
କୀଲକଂ, ଦଶପ୍ରଣବସଂୟୁକ୍ତା ସବ୍ୟାହୃତିକା ତୁର୍ୟପାଦସହିତା ବ୍ୟାପକଂ,
ମମ ଧର୍ମାର୍ଥକାମମୋକ୍ଷାର୍ଥେ ଜପେ ବିନିୟୋଗଃ । ଅଥ ନ୍ୟାସାନ୍ କୁର୍ୟାତ୍ ।
ଅଥ ଧ୍ୟାନମ୍ ।
ଗାୟତ୍ରୀଂ ବେଦଧାତ୍ରୀଂ ଶତମଖଫଲଦାଂ ବେଦଶାସ୍ତ୍ରୈକବେଦ୍ୟାଂ
ଚିଚ୍ଛକ୍ତିଂ ବ୍ରହ୍ମବିଦ୍ୟାଂ ପରମଶିବପଦାଂ ଶ୍ରୀପଦଂ ବୈ କରୋତି ।
ସର୍ୱୋତ୍କୃଷ୍ଟଂ ପଦଂ ତତ୍ସବିତୁରନୁପଦାନ୍ତେ ବରେଣ୍ୟଂ ଶରଣ୍ୟଂ
ଭର୍ଗୋ ଦେବସ୍ୟ ଧୀମହ୍ୟଭିଦଧତି ଧିୟୋ ଯୋ ନଃ ପ୍ରଚୋଦୟାଦିତ୍ୟୌର୍ୱତେଜଃ ॥ ୧॥
ସାମ୍ରାଜ୍ୟବୀଜଂ ପ୍ରଣବତ୍ରିପାଦଂ ସବ୍ୟାପସବ୍ୟଂ ପ୍ରଜପେତ୍ସହସ୍ରକମ୍ ।
ସମ୍ପୂର୍ଣକାମଂ ପ୍ରଣବଂ ବିଭୂତିଂ ତଥା ଭବେଦ୍ୱାକ୍ୟବିଚିତ୍ରବାଣୀ ॥ ୨॥
ଶୁଭଂ ଶିବଂ ଶୋଭନମସ୍ତୁ ମହ୍ୟଂ ସୌଭାଗ୍ୟଭୋଗୋତ୍ସବମସ୍ତୁ ନିତ୍ୟମ୍ ।
ପ୍ରକାଶବିଦ୍ୟାତ୍ରୟଶାସ୍ତ୍ରସର୍ୱଂ ଭଜେନ୍ମହାମନ୍ତ୍ରଫଲଂ ପ୍ରିୟେ ବୈ ॥ ୩॥
ବ୍ରହ୍ମାସ୍ତ୍ରଂ ବ୍ରହ୍ମଦଣ୍ଡଂ ଶିରସି ଶିଖିମହଦ୍ବ୍ରହ୍ମଶୀର୍ଷଂ ନମୋନ୍ତଂ
ସୂକ୍ତଂ ପାରାୟଣୋକ୍ତଂ ପ୍ରଣବମଥ ମହାବାକ୍ୟସିଦ୍ଧାନ୍ତମୂଲମ୍ ।
ତୁର୍ୟଂ ତ୍ରୀଣି ଦ୍ୱିତୀୟଂ ପ୍ରଥମମନୁମହାବେଦବେଦାନ୍ତସୂକ୍ତଂ
ନିତ୍ୟଂ ସ୍ମୃତ୍ୟାନୁସାରଂ ନିୟମିତଚରିତଂ ମୁଲମନ୍ତ୍ରଂ ନମୋନ୍ତମ୍ ॥ ୪॥
ଅସ୍ତ୍ରଂ ଶସ୍ତ୍ରହତଂ ତ୍ୱଘୋରସହିତଂ ଦଣ୍ଡେନ ବାଜୀହତଂ
ଚାଦିତ୍ୟାଦିହତଂ ଶିରୋନ୍ତସହିତଂ ପାପକ୍ଷୟାର୍ଥଂ ପରମ୍ ।
ତୁର୍ୟାତ୍ୟାଦିବିଲୋମମନ୍ତ୍ରପଠନଂ ବୀଜଂ ଶିଖାନ୍ତୋର୍ଧ୍ୱକଂ
ନିତ୍ୟଂ କାଲନିୟମ୍ୟବିପ୍ରବିଦୁଷାଂ କିଂ ଦୁଷ୍କୃତଂ ଭୂସୁରାନ୍ ॥ ୫॥
ନିତ୍ୟଂ ମୁକ୍ତିପଦଂ ନିୟମ୍ୟ ପବନଂ ନିର୍ଘୋଷଶକ୍ତିତ୍ରୟଂ
ସମ୍ୟଗ୍ଜ୍ଞାନଗୁରୂପଦେଶବିଧିବଦ୍ଦେବୀଂଶିଖାନ୍ତାମପି ।
ଷଷ୍ଟ୍ୟୈକୋତ୍ତରସଙ୍ଖ୍ୟଯାନୁମତସୌଷୁମ୍ନାଦିମାର୍ଗତ୍ରୟୀଂ
ଧ୍ୟାୟାନ୍ନିତ୍ୟସମସ୍ତବେଦଜନନୀଂ ଦେବୀଂ ତ୍ରିସନ୍ଧ୍ୟାମୟୀମ୍ ॥ ୬॥
ଗାୟତ୍ରୀଂ ସକଲାଗମାର୍ଥବିଦୁଷାଂ ସୌରସ୍ୟ ବୀଜେଶ୍ୱରୀଂ
ସର୍ୱାମ୍ନାୟସମସ୍ତମନ୍ତ୍ରଜନନୀଂ ସର୍ୱଜ୍ଞଧାମେଶ୍ୱରୀମ୍ମ୍ ।
ବ୍ରହ୍ମାଦିତ୍ରୟସ୍ପୁଟାର୍ଥକରଣୀଂ ସଂସାରପାରାୟଣୀଂ
ସନ୍ଧ୍ୟାଂ ସର୍ୱସମାନତନ୍ତ୍ରପରୟା ବ୍ରହ୍ମାନୁସନ୍ଧାୟିନୀମ୍ ॥ ୭॥
ଏକଦ୍ୱିତ୍ରିଚତୁଃସମାନଗଣନାବର୍ଣାଷ୍ଟକଂ ପାଦୟୋଃ
ପାପାଦୌ ପ୍ରଣବାଦିମନ୍ତ୍ରପଠନେ ମନ୍ତ୍ରତ୍ରୟୀସମ୍ପୁଟାମ୍ ।
ସନ୍ଧ୍ୟାୟାଂ ଦ୍ୱିପଦଂ ପଠେତ୍ପରତରଂ ସାୟଂ ତୁରୀୟଂ ଯୁତଂ
ନିତ୍ୟାନିତ୍ୟମନନ୍ତକୋଟିଫଲଦଂ ପ୍ରାପ୍ତଂ ନମସ୍କୁର୍ମହେ ॥ ୮॥
ଓଜୋଽସୀତି ସହୋଽସ୍ୟହୋ ବଲମସି ଭ୍ରାଜୋଽସି ତେଜସ୍ୱିନୀ
ବର୍ଚସ୍ୱୀ ସବିତାଗ୍ନିସୋମମମୃତଂ ରୂପଂ ପରଂ ଧୀମହି ।
ଦେବାନାଂ ଦ୍ୱିଜବର୍ୟତାଂ ମୁନିଗଣେ ମୁକ୍ତ୍ୟର୍ଥିନାଂ ଶାନ୍ତିନା-
ମୋମିତ୍ୟେକମୃଚଂ ପଠନ୍ତି ଯମିନୋ ଯଂ ଯଂ ସ୍ମରେତ୍ପ୍ରାପ୍ନୁୟାତ୍ ॥ ୯॥
ଓଭିତ୍ୟେକମଜସ୍ୱରୂପମମଲଂ ତତ୍ସପ୍ତଧା ଭାଜିତଂ
ତାରଂ ତନ୍ତ୍ରସମନ୍ୱିତଂ ପରତରେ ପାଦତ୍ରୟଂ ଗର୍ଭିତମ୍ ।
ଆପୋଜ୍ୟୋତିରସୋଽମୃତଂ ଜନମହଃ ସତ୍ୟଂ ତପଃ ସ୍ୱର୍ଭୁବ-
ର୍ଭୂୟୋଭୂୟ ନମାମି ଭୂର୍ଭୁବଃସ୍ୱରୋମେତୈର୍ମହାମନ୍ତ୍ରକମ୍ ॥ ୧୦॥
ଆଦୌ ବିନ୍ଦୁମନୁସ୍ମରନ୍ ପରତରେ ବାଲା ତ୍ରିବର୍ଣୋଚ୍ଚରନ୍
ବ୍ୟାହୃତ୍ୟାଦିସବିନ୍ଦୁୟୁକ୍ତତ୍ରିପଦାତାରତ୍ରୟଂ ତୁର୍ୟକମ୍ ।
ଆରୋହାଦବରୋହତଃ କ୍ରମଗତା ଶ୍ରୀକୁଣ୍ଡଲୀତ୍ଥଂ ସ୍ଥିତା
ଦେବୀ ମାନସପଙ୍କଜେ ତ୍ରିନୟନା ପଞ୍ଚାନନା ପାତୁ ମାମ୍ ॥ ୧୧॥
ସର୍ୱେ ସର୍ୱବଶେ ସମସ୍ତସମୟେ ସତ୍ୟାତ୍ମିକ୍ରେ ସାତ୍ୱିକେ
ସାବିତ୍ରୀସବିତାତ୍ମକେ ଶଶିୟୁତେ ସାଙ୍ଖ୍ୟାୟନୀଗୋତ୍ରଜେ ।
ସନ୍ଧ୍ୟାତ୍ରୀଣ୍ୟୁପକଲ୍ପ୍ୟ ସଙ୍ଗ୍ରହବିଧିଃ ସନ୍ଧ୍ୟାଭିଧାନାତ୍ମକେ
ଗାୟତ୍ରୀପ୍ରଣବାଦିମନ୍ତ୍ରଗୁରୁଣା ସମ୍ପ୍ରାପ୍ୟ ତସ୍ମୈ ନମଃ ॥ ୧୨॥
କ୍ଷେମଂ ଦିବ୍ୟମନୋରଥାଃ ପରତରେ ଚେତଃ ସମାଧୀୟତାଂ
ଜ୍ଞାନଂ ନିତ୍ୟବରେଣ୍ୟମେତଦମଲଂ ଦେବସ୍ୟ ଭର୍ଗୋ ଧିୟମ୍ ।
ମୋକ୍ଷଶ୍ରୀର୍ୱିଜୟାର୍ଥିନୋଽଥ ସବିତୁଃ ଶ୍ରେଷ୍ଠଂ ବିଧିସ୍ତତ୍ପଦଂ
ପ୍ରଜ୍ଞା ମେଧପ୍ରଚୋଦୟାତ୍ପ୍ରତିଦିନଂ ଯୋ ନଃ ପଦଂ ପାତୁ ମାମ୍ ॥ ୧୩॥
ସତ୍ୟଂ ତତ୍ସବିତୁର୍ୱରେଣ୍ୟବିରଲଂ ବିଶ୍ୱାଦିମାୟାତ୍ମକଂ
ସର୍ୱାଦ୍ୟଂ ପ୍ରତିପାଦପାଦରମୟା ତାରଂ ତଥା ମନ୍ମଥମ୍ ।
ତୁର୍ୟାନ୍ୟତ୍ତ୍ରିତୟଂ ଦ୍ୱିତୀୟମପରଂ ସଂୟୋଗସବ୍ୟାହୃତିଂ
ସର୍ୱାମ୍ନାୟମନୋମୟୀଂ ମନସିଜାଂ ଧ୍ୟାୟାମି ଦେବୀଂ ପରାମ୍ ॥ ୧୪॥
ଆଦୌ ଗାୟତ୍ରିମନ୍ତ୍ରେ ଗୁରୁକୃତନିୟମଂ ଧର୍ମକର୍ମାନୁକୂଲଂ
ସର୍ୱାଦ୍ୟଂ ସାରଭୂତଂ ସକଲମନୁମୟଂ ଦେବତାନାମଗମ୍ୟମ୍ ।
ଦେବାନାଂ ପୂର୍ୱଦେବଂ, ଦ୍ୱିଜକୁଲମୁନିଭିଃ ସିଦ୍ଧବିଦ୍ୟାଧରାଦ୍ୟୈଃ
କୋ ବା ବକ୍ତୁଂ ସମର୍ଥସ୍ତବମନୁମହିମାବୀଜରାଜାଦିମୂଲମ୍ ॥ ୧୫॥
ଗାୟତ୍ରୀଂ ତ୍ରିପଦାଂ ତ୍ରିବୀଜସହିତାଂ ଦ୍ୱିବ୍ୟାହୃତିଂ ତ୍ରୈପଦାଂ
ତ୍ରିବ୍ରହ୍ମାତ୍ରିଗୁଣାଂ ତ୍ରିକାଲନିୟମାଂ ବେଦତ୍ରୟୀଂ ତାଂ ପରାମ୍ ।
ସାଙ୍ଖ୍ୟାଦିତ୍ରୟରୂପିଣୀଂ ତ୍ରିନୟନାଂ ମାତୃତ୍ରୟୀଂ ତତ୍ପରାମ୍
ତ୍ରୈଲୋକ୍ୟତ୍ରିଦଶବିକୋଟିସହିତାଂ ସନ୍ଧ୍ୟାଂ ତ୍ରୟୀଂ ତାଂ ନୁମଃ ॥ ୧୬॥
ଓମିତ୍ୟେତତ୍ତ୍ରିମାତ୍ରାତ୍ରିଭୁବନକରଣଂ ତ୍ରିସ୍ୱରଂ ବହ୍ନିରୂପଂ
ତ୍ରୀଣି ତ୍ରୀଣି ତ୍ରିପାଦଂ ତ୍ରିଗୁଣଗୁଣମୟଂ ତ୍ରୈପୁରାନ୍ତଂ ତ୍ରିସୂକ୍ତମ୍ ।
ତତ୍ତ୍ୱାନାଂ ପୂରବଶକ୍ତିଂ ତ୍ରିତୟଗୁରୁପଦଂ ପୀଠୟନ୍ତ୍ରାତ୍ମକଂ ତଂ
ତସ୍ମାଦେତତ୍ ତ୍ରିପାଦଂ ତ୍ରିପଦମନୁସରଂ ତ୍ରାହି ମାଂ ଭୋ ନମସ୍ତେ ॥ ୧୭॥
ସ୍ୱସ୍ତି ଶ୍ରଦ୍ଧାତିମେଧା ମଧୁମତିମଧୁରଃ ସଂଶୟଃ ପ୍ରଜ୍ଞକାନ୍ତି
ର୍ୱିଦ୍ୟା ବୁଦ୍ଧିର୍ବଲଂ ଶ୍ରୀରତନୁଧନପତିଃ ସୌମ୍ୟବାକ୍ୟାନୁବୃତ୍ତିଃ ।
ମେଧା ପ୍ରଜ୍ଞା ପ୍ରତିଷ୍ଠା ମୃଦୁମତିମଧୁରାପୂର୍ଣବିଦ୍ୟାପ୍ରପୂର୍ଣଂ
ପ୍ରାପ୍ତଂ ପ୍ରତ୍ୟୂଷଚିନ୍ତ୍ୟଂ ପ୍ରଣବପରବଶାତ୍ପ୍ରାଣିନାଂ ନିତ୍ୟକର୍ମ ॥ ୧୮॥
ପଞ୍ଚାଶଦ୍ୱର୍ଣମଧ୍ୟେ ପ୍ରଣବପରୟୁତେ ମନ୍ତ୍ରମାଦ୍ୟଂ ନମୋନ୍ତଂ
ସର୍ୱଂ ସବ୍ୟାପସବ୍ୟଂ ଶତଗୁଣମଭିତୋ ବର୍ମ ହ୍ୟଷ୍ଟୋତ୍ତରଂ ତେ ।
ଏବ ନିତ୍ୟଂ ପ୍ରଜପ୍ତଂ ତ୍ରିଭୁବନସହିତଂ ସୂର୍ୟମନ୍ତଂ ତ୍ରିପାଦଂ
ଜ୍ଞାନଂ ବିଜ୍ଞାନଗମ୍ୟଂ ଗଗନସୁସଦୃଶଂ ଧ୍ୟାୟତେ ଯଃ ସ ମୁକ୍ତଃ ॥ ୧୯॥
ଆଦିକ୍ଷାନ୍ତସବିନ୍ଦୁୟୁକ୍ତସହିତଂ ମେରୁଂ କ୍ଷକାରାତ୍ମକଂ
ବ୍ୟସ୍ତାବ୍ୟସ୍ତସମସ୍ତବର୍ଗସହିତଂ ପୂର୍ଣଂ ଶତାଷ୍ଟୋତ୍ତରମ୍ ।
ଗାୟତ୍ରୀଂ ଜପତାଂ ତ୍ରିକାଲସହିତାଂ ନିତ୍ୟଂ ସନୈମିତ୍ତିକମେବଂ
ଜାପ୍ୟଫଲଂ ଶିବେନ କଥିତଂ ସଦ୍ଭୋଗ୍ୟମୋକ୍ଷପ୍ରଦମ୍ ॥ ୨୦॥
ସପ୍ତବ୍ୟାହୃତିସପ୍ତତାରବିକୃତିଃ ସତ୍ୟଂ ବରେଣ୍ୟଂ ଧୃତିଃ
ସର୍ୱଂ ତତ୍ସବିତୁଶ୍ଚ ଧୀମହି ମହାଭର୍ଗସ୍ୟ ଦେବଂ ଭଜେ ।
ଧାମ୍ନୋ ଧାମ ଧମାଧିଧାରଣମହାନ୍ଧୀମତ୍ପଦଂ ଧ୍ୟାୟତେ
ଓଁ ତତ୍ସର୍ୱମନୁପ୍ରପୂର୍ଣଦଶକଂ ପାଦତ୍ରୟଂ କେବଲମ୍ ॥ ୨୧॥
ବିଜ୍ଞାନେ ବିଲସଦ୍ୱିବେକବଚସଃ ପ୍ରଜ୍ଞାନୁସନ୍ଧାରିଣୀଂ
ଶ୍ରଦ୍ଧାମେଧ୍ୟଯଶଃଶିରଃସୁମନସଃ ସ୍ୱସ୍ତି ଶ୍ରିୟଂ ତ୍ୱାଂ ସଦା ।
ଆୟୁଷ୍ୟଂ ଧନଧାନ୍ୟଲକ୍ଷ୍ମିମତୁଲାଂ ଦେବୀଂ କଟାକ୍ଷଂ ପରଂ
ତତ୍କାଲେ ସକଲାର୍ଥସାଧନମଦାନ୍ମୁକ୍ତିର୍ମହତ୍ତ୍ୱଂ ପଦମ୍ ॥ ୨୨॥
ପୃଥ୍ୱୀଗନ୍ଧୋଽର୍ଚନାୟାଂ ନଭସି କୁସୁମତା ବାୟୁଧୂପପ୍ରକର୍ଷୋ
ବହ୍ନିର୍ଦୀପପ୍ରକାଶୋ ଜଲମମୃତମୟଂ ନିତ୍ୟସଙ୍କଲ୍ପପୂଜା ।
ଏତତ୍ସର୍ୱଂ ନିବେଦ୍ୟଂ ସୁଖବତି ହୃଦୟେ ସର୍ୱଦା ଦମ୍ପତୀନାଂ
ତ୍ୱଂ ସର୍ୱଜ୍ଞା ଶିବଂ ମେ କୃରୁ ତବ ମମତା ଭକ୍ତବୃନ୍ଦେ ପ୍ରସିଦ୍ଧା ॥ ୨୩॥
ସୌମ୍ୟଂ ସୌଭାଗ୍ୟହେତୁଂ ସକଲସୁଖକରଂ ସର୍ୱସୌଖ୍ୟଂ ସମସ୍ତଂ
ସତ୍ୟଂ ସଦ୍ଭୋଗନିତ୍ୟଂ ସୁଖଜନସୁହୃଦଂ ସୁନ୍ଦରଂ ଶ୍ରୀସମସ୍ତମ୍ ।
ସୌମଙ୍ଗଲ୍ୟଂ ସମଗ୍ରଂ ସକଲଶୁଭକରଂ ସ୍ୱସ୍ତିବାଚଂ ସମସ୍ତଂ
ସର୍ୱାଦ୍ୟଂ ସଦ୍ୱିବେକଂ ତ୍ରିପଦପଦୟୁଗଂ ପ୍ରାପ୍ତୁମଧ୍ୟାସମସ୍ତମ୍ ॥ ୨୪॥
ଗାୟତ୍ରୀପଦପଞ୍ଚପଞ୍ଚପ୍ରଣବଦ୍ୱନ୍ଦ୍ୱଂ ବିଧୌ ସମ୍ପୁଟଂ
ସୃଷ୍ଟ୍ୟାଦିକ୍ରମନ୍ତ୍ରଜାପ୍ୟଦଶକଂ ଦେବୀପଦଂ କ୍ଷୁତ୍ତ୍ରୟମ୍ ।
ମନ୍ତ୍ରାତିସ୍ଥିତିକେଷୁ ସମ୍ପୁଟମିଦଂ ଶ୍ରୀମାତୃକାବେଷ୍ଟନଂ
ବର୍ଣାନ୍ତ୍ୟାଦିବିଲୋମମନ୍ତ୍ରଜପନଂ ସଂହାରସମ୍ମୋହନମ୍ ॥ ୨୫॥
ଭୂରାଦ୍ୟଂ ଭୂର୍ଭୁବଃସ୍ୱସ୍ତ୍ରିପଦପଦୟୁତଂ ତ୍ର୍ୟକ୍ଷମାଦ୍ୟନ୍ତୟୋଜ୍ୟଂ
ସୃଷ୍ଟିସ୍ଥିତ୍ୟନ୍ତକାର୍ୟଂ କ୍ରମଶିଖିସକଲଂ ସର୍ୱମନ୍ତ୍ରଂ ପ୍ରଶସ୍ତମ୍ ।
ସର୍ୱାଙ୍ଗଂ ମାତୃକାଣାଂ ମନୁମୟବପୁଷଂ ମନ୍ତ୍ରୟୋଗପ୍ରୟୁକ୍ତଂ
ସଂହାରଂ କ୍ଷାଦିବର୍ଣଂ ବସୁଶତଗଣନଂ ମନ୍ତ୍ରରାଜଂ ନମାମି ॥ ୨୬॥
ବିଶ୍ୱାମିତ୍ରମୁଦାହୃତଂ ହିତକରଂ ସର୍ୱାର୍ଥସିଦ୍ଧିପ୍ରଦଂ
ସ୍ତୋତ୍ରାଣାଂ ପରମଂ ପ୍ରଭାତସମୟେ ପାରାୟଣଂ ନିତ୍ୟଶଃ ।
ବେଦାନାଂ ବିଧିବାଦମନ୍ତ୍ରସଫଲଂ ସିଦ୍ଧିପ୍ରଦଂ ସମ୍ପଦାଂ
ସ ପ୍ରାପ୍ନୋତ୍ୟପରତ୍ର ସର୍ୱସୁଖଦମାୟୁଷ୍ୟମାରୋଗ୍ୟତାମ୍ ॥ ୨୭॥
ଇତି ଶ୍ରୀବିଶ୍ୱାମିତ୍ରପ୍ରଣୀତୋ ଗାୟତ୍ରୀସ୍ତବରାଜଃ ସମ୍ପୂର୍ଣଃ ॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଗାୟତ୍ର୍ୟୁପନିଷତ୍ https://gayatree-upasana.blogspot.com/2022/10/blog-post_23.html
No comments:
Post a Comment