ଆଦି ଶକ୍ତିରିତି ବିଷ୍ଣୋସ୍ତାମହଂ ପ୍ରଣମାମି ହି ।
ସର୍ଗଃ ସ୍ଥିତିର୍ୱିନାଶଶ୍ଚ ଜାୟନ୍ତେ ଜଗତୋଽନୟା ॥ ୧॥
ନାଭି-ପଦ୍ମ-ଭୁବା ବିଷ୍ଣୋର୍ବ୍ରହ୍ମଣା ନିର୍ମିତଂ ଜଗତ୍ ।
ସ୍ଥାବରଂ ଜଙ୍ଗମଂ ଶକ୍ତ୍ୟା ଗାୟତ୍ର୍ୟା ଏବ ବୈ ଧ୍ରୁବମ୍ ॥ ୨॥
ଚନ୍ଦ୍ରଶେଖର କେଶେଭ୍ୟୋ ନିର୍ଗତା ହି ସୁରାପଗା ।
ଭଗୀରଥଂ ତତାରୈବ ପରିବାରସମଂ ଯଥା ॥ ୩॥
ଜଗଦ୍ଧାତ୍ରୀ ସମୁଦ୍ଭୂୟ ଯା ହୃନ୍ମାନସରୋବରେ ।
ଗାୟତ୍ରୀ ସକୁଲଂ ପାରଂ ତଥା ନୟତି ସାଧକମ୍ ॥ ୪॥
ସାସ୍ତି ଗଙ୍ଗୈବ ଜ୍ଞାନାଖ୍ୟସୁନୀରେଣ ସମାକୁଲା ।
ଜ୍ଞାନ ଗଙ୍ଗା ତୁ ତାଂ ଭକ୍ତ୍ୟା ବାରଂ-ବାରଂ ନମାମ୍ୟହମ୍ ॥ ୫॥
ଋଷୟୋ ବେଦ-ଶାସ୍ତ୍ରାଣି ସର୍ୱେ ଚୈବ ମହର୍ଷୟଃ ।
ଶ୍ରଦ୍ଧୟା ହୃଦି ଗାୟତ୍ରୀଂ ଧାରୟନ୍ତି ସ୍ତୁବନ୍ତି ଚ ॥ ୬॥
ହ୍ରୀଂ ଶ୍ରୀଂ କ୍ଲୀଂ ଚେତି ରୂପୈସ୍ତୁ ତ୍ରିଭିର୍ୱା ଲୋକପାଲିନୀ ।
ଭାସତେ ସତତଂ ଲୋକେ ଗାୟତ୍ରୀ ତ୍ରିଗୁଣାତ୍ମିକା ॥ ୭॥
ଗାୟତ୍ର୍ୟୈବ ମତା ମାତା ବେଦାନାଂ ଶାସ୍ତ୍ରସମ୍ପଦାମ୍ ।
ଚତ୍ୱାରୋଽପି ସମୁତ୍ପନ୍ନା ବେଦାସ୍ତସ୍ୟା ଅସଂଶୟମ୍ ॥ ୮॥
ପରମାତ୍ମନସ୍ତୁ ଯା ଲୋକେ ବ୍ରହ୍ମ ଶକ୍ତିର୍ୱିରାଜତେ ।
ସୂକ୍ଷ୍ମା ଚ ସାତ୍ତ୍ୱିକୀ ଚୈବ ଗାୟତ୍ରୀତ୍ୟଭିଧୀୟତେ ॥ ୯॥
ପ୍ରଭାବାଦେବ ଗାୟତ୍ର୍ୟା ଭୂତାନାମଭିଜାୟତେ ।
ଅନ୍ତଃକରଣେଷୁ ଦେବାନାଂ ତତ୍ତ୍ୱାନାଂ ହି ସମୁଦ୍ଭବଃ ॥ ୧୦॥
ଗାୟତ୍ର୍ୟୁପାସନାକରଣାଦାତ୍ମଶକ୍ତିର୍ୱିବର୍ଧତେ ।
ପ୍ରାପ୍ୟତେ କ୍ରମଶୋଽଜସ୍ୟ ସାମୀପ୍ୟଂ ପରମାତ୍ମନଃ ॥ ୧୧॥
ଶୌଚଂ ଶାନ୍ତିର୍ୱିବେକଶ୍ଚୈତଲ୍ଲାଭ ତ୍ରୟମାତ୍ମିକମ୍ ।
ପଶ୍ଚାଦବାପ୍ୟତେ ନୂନଂ ସୁସ୍ଥିରଂ ତଦୁପାସକମ୍ ॥ ୧୨॥
କାର୍ୟେଷୁ ସାହସଃ ସ୍ଥୈର୍ୟଂ କର୍ମନିଷ୍ଠା ତଥୈବ ଚ ।
ଏତେ ଲାଭାଶ୍ଚ ବୈ ତସ୍ମାଜ୍ଜାୟନ୍ତେ ମାନସାସ୍ତ୍ରୟଃ ॥ ୧୩॥
ପୁଷ୍କଲଂ ଧନ-ସଂସିଦ୍ଧିଃ ସହୟୋଗଶ୍ଚ ସର୍ୱତଃ ।
ସ୍ୱାସ୍ଥ୍ୟଂ ବା ତ୍ରୟ ଏତେ ସ୍ୟୁସ୍ତସ୍ମାଲ୍ଲାଭାଶ୍ଚ ଲୌକିକାଃ ॥ ୧୪॥
କାଠିନ୍ୟଂ ବିବିଧଂ ଘୋରଂ ହ୍ୟାପଦାଂ ସଂହତିସ୍ତଥା ।
ଶୀଘ୍ରଂ ବିନାଶତାଂ ଯାନ୍ତି ବିବିଧା ବିଘ୍ନରାଶୟଃ ॥ ୧୫॥
ବିନାଶାଦୁକ୍ତ ଶତ୍ରୂଣାମନ୍ତଃ ଶକ୍ତିର୍ୱିବର୍ଧତେ ।
ସଙ୍କଟାନାମନାୟାସଂ ପାରଂ ଯାତି ତୟା ନରଃ ॥ ୧୬॥
ଗାୟତ୍ର୍ୟୁପାସକସ୍ୱାନ୍ତେ ସତ୍କାମା ଉଦ୍ଭବନ୍ତି ହି ।
ତତ୍ପୂର୍ତୟେଽଭିଜାୟନ୍ତେ ସହଜଂ ସାଧନାନ୍ୟପି ॥ ୧୭॥
ତ୍ରୁଟୟଃ ସର୍ୱଥା ଦୋଷା ବିଘ୍ନା ଯାନ୍ତି ଯଦାନ୍ତତାମ୍ ।
ମାନବୋ ନିର୍ଭୟଂ ଯାତି ପୂର୍ଣୋନ୍ନତି ପଥଂ ତଦା ॥ ୧୮॥
ବାହ୍ୟଞ୍ଚାଭ୍ୟନ୍ତରଂ ତ୍ୱସ୍ୟ ନିତ୍ୟଂ ସନ୍ମାର୍ଗଗାମିନଃ ।
ଉନ୍ନତେରୁଭୟଂ ଦ୍ୱାରଂ ଯାତ୍ୟୁନ୍ମୁକ୍ତକପାଟତାମ୍ ॥ ୧୯॥
ଅତଃ ସ୍ୱସ୍ଥେନ ଚିତ୍ତେନ ଶ୍ରଦ୍ଧୟା ନିଷ୍ଠୟା ତଥା ।
କର୍ତବ୍ୟାବିରତଂ କାଲେ ଗାୟତ୍ର୍ୟାଃ ସମୁପାସନା ॥ ୨୦॥
ଦୟାଲୁଃ ଶକ୍ତି ସମ୍ପନ୍ନା ମାତା ବୁଦ୍ଧିମତୀ ଯଥା ।
କଲ୍ୟାଣଂ କୁରୁତେ ହ୍ୟେବ ପ୍ରେମ୍ଣା ବାଲସ୍ୟ ଚାତ୍ମନଃ ॥ ୨୧॥
ତଥୈବ ମାତା ଲୋକାନାଂ ଗାୟତ୍ରୀ ଭକ୍ତବତ୍ସଲା ।
ବିଦଧାତି ହିତଂ ନିତ୍ୟଂ ଭକ୍ତାନାଂ ଧ୍ରୁବମାତ୍ମନଃ ॥ ୨୨॥
କୁର୍ୱନ୍ନପି ତ୍ରୁଟୀର୍ଲୋକେ ବାଲକୋ ମାତରଂ ପ୍ରତି ।
ଯଥା ଭବତି କଶ୍ଚିନ୍ନ ତସ୍ୟା ଅପ୍ରୀତିଭାଜନଃ ॥ ୨୩॥
କୁର୍ୱନ୍ନପି ତ୍ରୁଟୀର୍ଭକ୍ତଃ କ୍ୱଚିତ୍ ଗାୟତ୍ର୍ୟୁପାସନେ ।
ନ ତଥା ଫଲମାପ୍ନୋତି ବିପରୀତଂ କଦାଚନ ॥ ୨୪॥
ଅକ୍ଷରାଣାଂ ତୁ ଗାୟତ୍ର୍ୟା ଗୁମ୍ଫନଂ ହ୍ୟସ୍ତି ତଦ୍ୱିଧମ୍ ।
ଭବନ୍ତି ଜାଗୃତା ଯେନ ସର୍ୱା ଗୁହ୍ୟାସ୍ତୁ ଗ୍ରନ୍ଥୟଃ ॥ ୨୫॥
ଜାଗୃତା ଗ୍ରନ୍ଥୟସ୍ତ୍ୱେତାଃ ସୂକ୍ଷ୍ମାଃ ସାଧକମାନସେ ।
ଦିବ୍ୟଶକ୍ତିସମୁଦ୍ଭୂତିଂ କ୍ଷିପ୍ରଂ କୁର୍ୱନ୍ତ୍ୟସଂଶୟମ୍ ॥ ୨୬॥
ଜନୟନ୍ତି କୃତେ ପୁଂସାମେତା ବୈ ଦିବ୍ୟଶକ୍ତୟଃ ।
ବିବିଧାନ୍ ବୈ ପରିଣାମାନ୍ ଭବ୍ୟାନ୍ ମଙ୍ଗଲପୂରିତାନ୍ ॥ ୨୭॥
ମନ୍ତ୍ରସ୍ୟୋଚ୍ଚାରଣଂ କାର୍ୟଂ ଶୁଦ୍ଧମେବାପ୍ରମାଦତଃ ।
ତଦଶକ୍ତୋ ଜପେନ୍ନିତ୍ୟଂ ସପ୍ରଣବାସ୍ତୁ ବ୍ୟାହୃତୀଃ ॥ ୨୮॥
ଓମିତି ପ୍ରଣବଃ ପୂର୍ୱଂ ଭୂର୍ଭୁବଃ ସ୍ୱସ୍ତଦୁତ୍ତରମ୍ ।
ଏଷୋକ୍ତା ଲଘୁ ଗାୟତ୍ରୀ ବିଦ୍ୱଦ୍ଭିର୍ୱେଦପଣ୍ଡିତୈଃ ॥ ୨୯॥
ଶୁଦ୍ଧଂ ପରିଧାନମାଧାୟ ଶୁଦ୍ଧେ ବୈ ବାୟୁମଣ୍ଡଲେ ।
ଶୁଦ୍ଧ ଦେହମନୋଭ୍ୟାଂ ବୈ କାର୍ୟା ଗାୟତ୍ର୍ୟୁପାସନା ॥ ୩୦॥
ଦୀକ୍ଷାମାଦାୟ ଗାୟତ୍ର୍ୟା ବ୍ରହ୍ମନିଷ୍ଠାଗ୍ରଜନ୍ମନା ।
ଆରଭ୍ୟତାଂ ତତଃ ସମ୍ୟଗ୍ୱିଧିନୋପାସନା ସତା ॥ ୩୧॥
ଗାୟତ୍ର୍ୟୁପାସନାମୁକ୍ତ୍ୱା ନିତ୍ୟାବଶ୍ୟକକର୍ମସୁ ।
ଉକ୍ତସ୍ତତ୍ର ଦ୍ୱିଜାତୀନାଂ ନାନଧ୍ୟାୟୋ ବିଚକ୍ଷଣୈଃ ॥ ୩୨॥
ଆରାଧୟନ୍ତି ଗାୟତ୍ରୀଂ ନ ନିତ୍ୟଂ ଯେ ଦ୍ୱିଜନ୍ମନଃ ।
ଜାୟନ୍ତେ ହି ସ୍ୱକର୍ମଭ୍ୟସ୍ତେ ଚ୍ୟୁତା ନାତ୍ର ସଂଶୟଃ ॥ ୩୩॥
ଶୂଦ୍ରାସ୍ତୁ ଜନ୍ମନା ସର୍ୱେ ପଶ୍ଚାଦ୍ୟାନ୍ତି ଦ୍ୱିଜନ୍ମତାମ୍ ।
ଗାୟତ୍ର୍ୟୈବ ଜନାଃ ସାକଂ ହ୍ୟୁପବୀତସ୍ୟ ଧାରଣାତ୍ ॥ ୩୪॥
ଉଚ୍ଚତା ପତିତାନାଂ ଚ ପାପିନାଂ ପାପନାଶନମ୍ ।
ଜାୟେତେ କୃପୟୈବାସ୍ୟାଃ ବେଦମାତୁରନନ୍ତୟା ॥ ୩୫॥
ଗାୟତ୍ର୍ୟା ଯା ଯୁତା ସନ୍ଧ୍ୟା ବ୍ରହ୍ମସନ୍ଧ୍ୟା ତୁ ସା ମତା ।
କୀର୍ତିତଂ ସର୍ୱତଃ ଶ୍ରେଷ୍ଠଂ ତସ୍ୟାନୁଷ୍ଠାନମାଗମୈଃ ॥ ୩୬॥
ଆଚମନଂ ଶିଖାବନ୍ଧଃ ପ୍ରାଣାୟାମୋଽଘମର୍ଷଣମ୍ ।
ନ୍ୟାସଶ୍ଚୋପାସନାୟାଂ ତୁ ପଞ୍ଚ କୋଷା ମତା ବୁଧୈଃ ॥ ୩୭॥
ଧ୍ୟାନତସ୍ତୁ ତତଃ ପଶ୍ଚାତ୍ ସାବଧାନେନ ଚେତସା ।
ଜପ୍ୟା ସତତଂ ତୁଲସୀ ମାଲୟା ଚ ମୁହୁର୍ମୁହୁଃ ॥ ୩୮॥
ଏକ ବାରଂ ପ୍ରତିଦିନଂ ନ୍ୟୂନତୋ ନ୍ୟୂନସଙ୍ଖ୍ୟକମ୍ ।
ଧୀମାନ୍ମନ୍ତ୍ର ଶତଂ ନୂନଂ ନିତ୍ୟମଷ୍ଟୋତ୍ତରଂ ଜପେତ୍ ॥ ୩୯॥
ବ୍ରାହ୍ମେ ମୁହୂର୍ତେ ପ୍ରାଙ୍ମୁଖୋ ମେରୁଦଣ୍ଡଂ ପ୍ରତନ୍ୟ ହି ।
ପଦ୍ମାସନଂ ସମାସୀନଃ ସନ୍ଧ୍ୟାବନ୍ଦନମାଚରେତ୍ ॥ ୪୦॥
ଦୈନ୍ୟରୁକ୍ ଶୋକ ଚିନ୍ତାନାଂ ବିରୋଧାକ୍ରମଣାପଦାମ୍ ।
କାର୍ୟଂ ଗାୟତ୍ର୍ୟନୁଷ୍ଠାନଂ ଭୟାନଂ ବାରଣାୟ ଚ ॥ ୪୧॥
ଜାୟତେ ସା ସ୍ଥିତିରସ୍ମାନ୍ମନୋଽଭିଲାଷୟାନ୍ୱିତା ।
ଯତଃ ସର୍ୱେଽଭିଜାୟନ୍ତେ ଯଥା କାଲଂ ହି ପୂର୍ଣତାମ୍ ॥ ୪୨॥
ଅନୁଷ୍ଠାନାତ୍ତୁ ବୈ ତସ୍ମାଦ୍ଗୁପ୍ତାଧ୍ୟାତ୍ମିକ-ଶକ୍ତୟଃ ।
ଚମତ୍କାରମୟା ଲୋକେ ପ୍ରାପ୍ୟନ୍ତେଽନେକଧା ବୁଧୈଃ ॥ ୪୩॥
ସପାଦଲକ୍ଷମନ୍ତ୍ରାଣାଂ ଗାୟତ୍ର୍ୟା ଜପନଂ ତୁ ବୈ ।
ଧ୍ୟାନେନ ବିଧିନା ଚୈବ ହ୍ୟନୁଷ୍ଠାନଂ ପ୍ରଚକ୍ଷତେ ॥ ୪୪ ।
ପଞ୍ଚମ୍ୟାଂ ପୂର୍ଣିମାୟାଂ ବା ଚୈକାଦଶ୍ୟାଂ ତଥୈବ ହି ।
ଅନୁଷ୍ଠାନସ୍ୟ କର୍ତବ୍ୟଂ ଆରମ୍ଭଃ ଫଲ-ପ୍ରାପ୍ତୟେ ॥ ୪୫॥
ମାସଦ୍ୱୟେଽବିରାମଂ ତୁ ଚତ୍ୱାରିଂଷଟ୍ ଦିନେଷୁ ବା ।
ପୂରୟେତ୍ତଦନୁଷ୍ଠାନଂ ତୁଲ୍ୟସଙ୍ଖ୍ୟାସୁ ବୈ ଜପନ୍ ॥ ୪୬॥
ତସ୍ୟାଃ ପ୍ରତିମାଂ ସୁସଂସ୍ଥାପ୍ୟ ପ୍ରେମ୍ଣା ଶୋଭନ-ଆସନେ ।
ଗାୟତ୍ର୍ୟାସ୍ତତ୍ର କର୍ତବ୍ୟା ସତ୍ପ୍ରତିଷ୍ଠା ବିଧାନତଃ ॥ ୪୭
ତଦ୍ୱିଧାୟ ତତୋ ଦୀପ-ଧୂପ-ନୈବେଦ୍ୟ-ଚନ୍ଦନୈଃ ।
ନମସ୍କୃତ୍ୟାକ୍ଷତେନାପି ତସ୍ୟାଃ ପୂଜନମାଚରେତ୍ ॥ ୪୮॥
ପୂଜନାନନ୍ତରଂ ବିଜ୍ଞଃ ଭକ୍ତ୍ୟା ତଜ୍ଜପମାରଭେତ୍ ।
ଜପକାଲେ ତୁ ମନଃ କାର୍ୟଂ ଶ୍ରଦ୍ଧାନ୍ୱିତମଚଞ୍ଚଲମ୍ ॥ ୪୯॥
କାର୍ୟତୋ ଯଦି ଚୋତ୍ତିଷ୍ଠେନ୍ମଧ୍ୟ ଏବ ତତଃ ପୁନଃ ।
କର-ପ୍ରକ୍ଷାଲନଂ କୃତ୍ୱା ଶୁଦ୍ଧୈରଙ୍ଗୈରୁପାବିଶେତ୍ ॥ ୫୦॥
ଆଦ୍ୟଶକ୍ତିର୍ୱେଦମାତା ଗାୟତ୍ରୀ ତୁ ମଦନ୍ତରେ ।
ଶକ୍ତିକଲ୍ଲୋଲସନ୍ଦୋହାନ୍ ଜ୍ଞାନଜ୍ୟୋତିଶ୍ଚ ସନ୍ତତମ୍ ॥ ୫୧॥
ଉତ୍ତରୋତ୍ତରମାକୀର୍ୟ ପ୍ରେରୟନ୍ତି ବିରାଜତେ ।
ଇତ୍ୟେବାବିରତଂ ଧ୍ୟାୟନ୍ ଧ୍ୟାନମଗ୍ନସ୍ତୁ ତାଂ ଜପେତ୍ ॥ ୫୨॥
ଚତୁର୍ୱିଂଶତିଲକ୍ଷାଣାଂ ସତତଂ ତଦୁପାସକଃ ।
ଗାୟତ୍ରୀଣାମନୁଷ୍ଠାନାଦ୍ଗାୟତ୍ର୍ୟାଃ ସିଦ୍ଧିମାପ୍ନୁତେ ॥ ୫୩
ସାଧନାୟୈ ତୁ ଗାୟତ୍ର୍ୟା ନିଶ୍ଛଲେନ ହି ଚେତସା ।
ବରଣୀୟଃ ସଦାଚାର୍ୟଃ ସାଧକେନ ସୁଭାଜନଃ ॥ ୫୪॥
ଲଘ୍ୱନୁଷ୍ଠାନତୋ ବାପି ମହାନୁଷ୍ଠାନତୋଽଥବା ।
ସିଦ୍ଧିଂ ବିନ୍ଦତି ବୈ ନୂନଂ ସାଧକଃ ସାନୁପାତିକାମ୍ ॥ ୫୫॥
ଏକ ଏବ ତୁ ସଂସିଦ୍ଧଃ ଗାୟତ୍ରୀ ମନ୍ତ୍ର ଆଦିଶତ୍ ।
ସମସ୍ତ-ଲୋକମନ୍ତ୍ରାଣାଂ କାର୍ୟସିଦ୍ଧେସ୍ତୁ ପୂରକଃ ॥ ୫୬॥
ଅନୁଷ୍ଠାନାବସାନେ ତୁ ଅଗ୍ନିହୋତ୍ରୋ ବିଧୀୟତାମ୍ ।
ଯଥାଶକ୍ତି ତତୋ ଦାନଂ ବ୍ରହ୍ମଭୋଜସ୍ତତଃ ଖଲୁ ॥ ୫୭॥
ମହାମନ୍ତ୍ରସ୍ୟ ଚାପ୍ୟସ୍ୟ ସ୍ଥାନେ ସ୍ଥାନେ ପଦେ ପଦେ ।
ଗୂଢାନନ୍ତୋପଦେଶାନାଂ ରହସ୍ୟଂ ତତ୍ର ବର୍ତତେ ॥ ୫୮॥
ଯୋ ଦଧାତି ନରଶ୍ଚୈତାନୁପଦେଶାଂସ୍ତୁ ମାନସେ ।
ଜାୟତେ ହ୍ୟୁଭୟଂ ତସ୍ୟ ଲୋକମାନନ୍ଦସଙ୍କୁଲମ୍ ॥ ୫୯॥
ସମଗ୍ରାମପି ସାମଗ୍ରୀମନୁଷ୍ଠାନସ୍ୟ ପୂଜିତାମ୍ ।
ସ୍ଥାନେ ପବିତ୍ର ଏବୈତାଂ କୁତ୍ରଚିଦ୍ଧି ବିସର୍ଜୟେତ୍ ॥ ୬୦॥
ସତ୍ପାତ୍ରୋ ଯଦି ବାଚାର୍ୟୋ ନ ଚେତ୍ସଂସ୍ଥାପୟେତ୍ତଦା ।
ନାରିକେଲଂ ଶୁଚିଂ ବୃତ୍ୱାଚାର୍ୟଭାବେନ ଚାସନେ ॥ ୬୧॥
ପ୍ରାୟଶ୍ଚିତ୍ତଂ ମତଂ ଶ୍ରେଷ୍ଠଂ ତ୍ରୁଟୀନାଂ ପାପକର୍ମଣାମ୍ ।
ତପଶ୍ଚର୍ୟୈବ ଗାୟତ୍ର୍ୟାଃ ନାତୋଽନ୍ୟଦ୍ଦୃଶ୍ୟତେ କ୍ୱଚିତ୍ ॥ ୬୨॥
ସେବ୍ୟାଃ ସ୍ୱାତ୍ମସମୁଦ୍ଧ୍ୟର୍ଥଂ ପଦାର୍ଥାଃ ସାତ୍ତ୍ୱିକାଃ ସଦା ।
ରାଜସାଶ୍ଚ ପ୍ରୟୋକ୍ତବ୍ୟାଃ ମନୋବାଞ୍ଛିତପୂର୍ତୟେ ॥ ୬୩॥
ପ୍ରାଦୁର୍ଭାବସ୍ତୁ ଭାବାନାଂ ତାମସାନାଂ ବିଜାୟତେ ।
ତମୋଗୁଣାନାମର୍ଥାନାଂ ସେବନାଦିତି ନିଶ୍ଚୟଃ ॥ ୬୪॥
ମାଲାସନ-ସମିଧ୍ୟଜ୍ଞ-ସାମଗ୍ର୍ୟର୍ଚନ-ସଙ୍ଗ୍ରହଃ ।
ଗୁଣତ୍ରୟାନୁସାରଂ ହି ସର୍ୱେ ବୈ ଦଦତେ ଫଲମ୍ ॥ ୬୫॥
ପ୍ରାଦୁର୍ଭବନ୍ତି ବୈ ସୂକ୍ଷ୍ମାଶ୍ଚତୁର୍ୱିଂଶତି ଶକ୍ତୟଃ ।
ଅକ୍ଷରେଭ୍ୟସ୍ତୁ ଗାୟତ୍ର୍ୟା ମାନବାନାଂ ହି ମାନସେ ॥ ୬୬॥
ମୁହୂର୍ତା ଯୋଗଦୋଷା ବା ଯେଽପ୍ୟମଙ୍ଗଲକାରିଣଃ ।
ଭସ୍ମତାଂ ଯାନ୍ତି ତେ ସର୍ୱେ ଗାୟତ୍ର୍ୟାସ୍ତୀବ୍ରତେଜସା ॥ ୬୭॥
ଏତସ୍ମାତ୍ତୁ ଜପାନ୍ନୂନଂ ଧ୍ୟାନମଗ୍ନେନ ଚେତସା ।
ଜାୟତେ କ୍ରମଶଶ୍ଚୈବ ଷଟ୍ ଚକ୍ରାଣାଂ ତୁ ଜାଗୃତିଃ ॥ ୬୮॥
ଷଟ୍ ଚକ୍ରାଣି ଯଦୈତାନି ଜାଗୃତାନି ଭବନ୍ତି ହି ।
ଷଟ୍ ସିଦ୍ଧୟୋଽଭିଜାୟନ୍ତେ ଚକ୍ରୈରେତୈର୍ନରସ୍ୟ ବୈ ॥ ୬୯॥
ଅଗ୍ନିହୋତ୍ରଂ ତୁ ଗାୟତ୍ରୀ ମନ୍ତ୍ରେଣ ବିଧିବତ୍ କୃତମ୍ ।
ସର୍ୱେଷ୍ୱବସରେଷ୍ୱେବ ଶୁଭମେବ ମତଂ ବୁଧୈଃ ॥ ୭୦॥
ଯଦାବସ୍ଥାସୁ ସ୍ୟାଲ୍ଲୋକେ ବିପନ୍ନାସୁ ତଦା ତୁ ସଃ ।
ମୌନଂ ମାନସିକଂ ଚୈବ ଗାୟତ୍ରୀ-ଜପମାଚରେତ୍ ॥ ୭୧॥
ତଦନୁଷ୍ଠାନକାଲେ ତୁ ସ୍ୱଶକ୍ତିଂ ନିୟମେଜ୍ଜନଃ ।
ନିମ୍ନକର୍ମସୁ ତାଃ ଧୀମାନ୍ ନ ବ୍ୟଯେଦ୍ଧି କଦାଚନ ॥ ୭୨
ନୈବାନାବଶ୍ୟକଂ କାର୍ୟମାତ୍ମୋଦ୍ଧାରସ୍ଥିତେନ ଚ ।
ଆତ୍ମଶକ୍ତେସ୍ତୁ ପ୍ରାପ୍ତାୟାଃ ଯତ୍ର ତତ୍ର ପ୍ରଦର୍ଶନମ୍ ॥ ୭୩॥
ଆହାରେ ବ୍ୟବହାରେ ଚ ମସ୍ତିଷ୍କେଽପି ତଥୈବ ହି ।
ସାତ୍ତ୍ୱିକେନ ସଦା ଭାବ୍ୟଂ ସାଧକେନ ମନୀଷିଣା ॥ ୭୪॥
କର୍ତବ୍ୟଧର୍ମତଃ କର୍ମ ବିପରୀତଂ ତୁ ଯଦ୍ଭବେତ୍ ।
ତତ୍ସାଧକସ୍ତୁ ପ୍ରଜ୍ଞାବାନାଚରେନ୍ନ କଦାଚନ ॥ ୭୫॥
ପୃଷ୍ଠତୋଽସ୍ୟାଃ ସାଧନାୟା ରାଜତେଽତିତରଂ ସଦା ।
ମନସ୍ୱିସାଧକାନାଂ ହି ବହୂନାଂ ସାଧନାବଲମ୍ ॥ ୭୬॥
ଅଲ୍ପୀୟସ୍ୟା ଜଗତ୍ୟେବଂ ସାଧନାୟାସ୍ତୁ ସାଧକଃ ।
ଭଗବତ୍ୟାଶ୍ଚ ଗାୟତ୍ର୍ୟାଃ କୃପାଂ ପ୍ରାପ୍ନୋତ୍ୟସଂଶୟମ୍ ॥ ୭୭॥
ପ୍ରାଣାୟାମେ ଜପନ୍ ଲୋକଃ ଗାୟତ୍ରୀଂ ଧ୍ରୁବମାପ୍ନୁତେ ।
ନିଗ୍ରହଂ ମନସଶ୍ଚୈବ ଇନ୍ଦ୍ରିୟାଣାଂ ହି ସମ୍ପଦାମ୍ ॥ ୭୮॥
ମନ୍ତ୍ରଂ ବିଭଜ୍ୟ ଭାଗେଷୁ ଚତୁର୍ଷୁ ସୁବୁଧସ୍ତଦା ।
ରେଚକଂ କୁମ୍ଭକଂ ବାହ୍ୟଂ ପୂରକଂ କୁମ୍ଭକଂ ଚରେତ୍ ॥ ୭୯॥
ଯଥା ପୂର୍ୱସ୍ଥିତଞ୍ଚୈବ ନ ଦ୍ରବ୍ୟଂ କାର୍ୟ-ସାଧକମ୍ ।
ମହାସାଧନତୋଽପ୍ୟସ୍ମାନ୍ନାଜ୍ଞୋ ଲାଭଂ ତଥାପ୍ନୁତେ ॥ ୮୦॥
ସାଧକଃ କୁରୁତେ ଯସ୍ତୁ ମନ୍ତ୍ରଶକ୍ତେରପବ୍ୟଯଃ ।
ତଂ ବିନାଶୟତି ସୈବ ସମୂଲଂ ନାତ୍ର ସଂଶୟଃ ॥ ୮୧॥
ସତତଂ ସାଧନାଭିର୍ୟୋ ଯାତି ସାଧକତାଂ ନରଃ ।
ସ୍ୱପ୍ନାବସ୍ଥାସୁ ଜାୟନ୍ତେ ତସ୍ୟ ଦିବ୍ୟାନୁଭୂତୟଃ ॥ ୮୨॥
ସଫଲଃ ସାଧକୋ ଲୋକେ ପ୍ରାପ୍ନୁତେଽନୁଭବାନ୍ ନବାନ୍ ।
ବିଚିତ୍ରାନ୍ ବିବିଧାଁଶ୍ଚୈବ ସାଧନାସିଦ୍ଧ୍ୟନନ୍ତରମ୍ ॥ ୮୩॥
ଭିନ୍ନାଭିର୍ୱିଧିଭିର୍ବୁଦ୍ଧ୍ୟା ଭିନ୍ନାସୁ କାର୍ୟପଙ୍କ୍ତିଷୁ ।
ଗାୟତ୍ର୍ୟାଃ ସିଦ୍ଧମନ୍ତ୍ରସ୍ୟ ପ୍ରୟୋଗଃ କ୍ରିୟତେ ବୁଧୈଃ ॥ ୮୪॥
ଚତୁର୍ୱିଂଶତିବର୍ଣୈର୍ୟା ଗାୟତ୍ରୀ ଗୁମ୍ଫିତା ଶ୍ରୁତୌ ।
ରହସ୍ୟମୁକ୍ତଂ ତତ୍ରାପି ଦିବ୍ୟୈଃ ରହସ୍ୟବାଦିଭିଃ ॥ ୮୫॥
ରହସ୍ୟମୁପବୀତସ୍ୟ ଗୁହ୍ୟାଦ୍ଗୁହ୍ୟତରଂ ହି ଯତ୍ ।
ଅନ୍ତର୍ହିତଂ ତୁ ତତ୍ସର୍ୱଂ ଗାୟତ୍ର୍ୟାଂ ବିଶ୍ୱମାତରି ॥ ୮୬॥
ଅୟମେବ ଗୁରୋର୍ମନ୍ତ୍ରଃ ଯଃ ସର୍ୱୋପରି ରାଜତେ ।
ବିନ୍ଦୌ ସିନ୍ଧୁରିବାସ୍ମିଂସ୍ତୁ ଜ୍ଞାନବିଜ୍ଞାନମାଶ୍ରିତମ୍ ॥ ୮୭॥
ଆଭ୍ୟନ୍ତରେ ତୁ ଗାୟତ୍ର୍ୟା ଅନେକେ ଯୋଗସଞ୍ଚୟାଃ ।
ଅନ୍ତର୍ହିତା ବିରାଜନ୍ତେ କଶ୍ଚିଦତ୍ର ନ ସଂଶୟଃ ॥ ୮୮॥
ଧାରୟନ୍ ହୃଦି ଗାୟତ୍ରୀଂ ସାଧକୋ ଧୌତକିଲ୍ବିଷଃ ।
ଶକ୍ତୀରନୁଭବତ୍ୟ୍ଗ୍ରାଃ ସ୍ୱସ୍ମିନ୍ନେବ ହ୍ୟଲୌକିକାଃ ॥ ୮୯॥
ଏତାଦୃଶ୍ୟସ୍ତୁ ବାର୍ତା ଭାସନ୍ତେଽଲ୍ପପ୍ରୟାସତଃ ।
ଯାସ୍ତୁ ସାଧାରଣୋ ଲୋକୋ ଜ୍ଞାତୁମର୍ହତି ନୈବ ହି ॥ ୯୦॥
ଏତାଦୃଶ୍ୟସ୍ତୁ ଜାୟନ୍ତେ ତନ୍ମନସ୍ୟନୁଭୂତୟଃ ।
ଯାଦୃଶ୍ୟୋ ନ ହି ଦୃଶ୍ୟନ୍ତେ ମାନବେଷୁ କଦାଚନ ॥ ୯୧॥
ପ୍ରସାଦଂ ବ୍ରହ୍ମଜ୍ଞାନସ୍ୟ ଯେଽନ୍ୟେଭ୍ୟୋ ବିତରନ୍ତ୍ୟପି ।
ଆସାଦୟନ୍ତି ତେ ନୂନଂ ମାନବାଃ ପୁଣ୍ୟମକ୍ଷୟମ୍ ॥ ୯୨॥
ଗାୟତ୍ରୀ ସଂହିତା ହ୍ୟେଷା ପରମାନନ୍ଦଦାୟିନୀ ।
ସର୍ୱେଷାମେବ କଷ୍ଟାନାଂ ବାରଣାୟାସ୍ତ୍ୟଲଂ ଭୁବି ॥ ୯୩॥
ଶ୍ରଦ୍ଧୟା ଯେ ପଠନ୍ତ୍ୟେନାଂ ଚିନ୍ତୟନ୍ତି ଚ ଚେତସା ।
ଆଚରନ୍ତ୍ୟାନୁକୂଲ୍ୟେନ ଭବବାଧାଂ ତରନ୍ତି ତେ ॥ ୯୪॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଗାୟତ୍ରୀହୃଦୟମ୍ https://gayatree-upasana.blogspot.com/2022/10/blog-post_26.html
No comments:
Post a Comment