ଶ୍ରୀଗଣେଶାୟ ନମଃ ।
ଯାଜ୍ଞବଲ୍କ୍ୟ ଉବାଚ ।
ସ୍ୱାମିନ୍ ସର୍ୱଜଗନ୍ନାଥ ସଂଶୟୋଽସ୍ତି ମହାନ୍ମମ ।
ଚତୁଃଷଷ୍ଠିକଲାନଂ ଚ ପାତକାନାଂ ଚ ତଦ୍ୱଦ ॥ ୧॥
ମୁଚ୍ୟତେ କେନ ପୁଣ୍ୟେନ ବ୍ରହ୍ମରୂପଂ କଥଂ ଭବେତ୍ ।
ଦେହଂ ଚ ଦେବତାରୂପଂ ମନ୍ତ୍ରରୂପଂ ବିଶେଷତଃ ॥ ୨॥
କ୍ରମତଃ ଶ୍ରୋତୁମିଚ୍ଛାମି କବଚଂ ବିଧିପୂର୍ୱକମ୍ ।
ବ୍ରହ୍ମୋବାଚ ।
ଗାୟତ୍ର୍ୟାଃ କବଚସ୍ୟାସ୍ୟ ବ୍ରହ୍ମା ବିଷ୍ଣୁଃ ଶିବୋ ଋଷିଃ ॥ ୩॥
ଋଗ୍ୟଜୁଃସାମାଥର୍ୱାଣି ଛନ୍ଦାଂସି ପରିକୀର୍ତିତାଃ ।
ପରବ୍ରହ୍ମସ୍ୱରୂପା ସା ଗାୟତ୍ରୀ ଦେବତା ସ୍ମୃତା ॥ ୪॥
ରକ୍ଷାହୀନଂ ତୁ ଯତ୍ସ୍ଥାନଂ କବଚେନ ବିନା କୃତମ୍ ।
ସର୍ୱଂ ସର୍ୱତ୍ର ସଂରକ୍ଷେତ୍ସର୍ୱାଙ୍ଗଂ ଭୁବନେଶ୍ୱରୀ ॥ ୫॥
ବୀଜଂ ଭର୍ଗଶ୍ଚ ଯୁକ୍ତିଶ୍ଚ ଧିୟଃ କୀଲକମେବ ଚ ।
ପୁରୁଷାର୍ଥବିନିୟୋଗୋ ଯୋ ନଶ୍ଚ ପରିକୀର୍ତ୍ତିତଃ ॥ ୬॥
ଋଷିଂ ମୂର୍ଧ୍ନି ନ୍ୟସେତ୍ପୂର୍ୱଂ ମୁଖେ ଛନ୍ଦ ଉଦୀରିତମ୍ ।
ଦେବତାଂ ହୃଦି ବିନ୍ୟସ୍ୟ ଗୁହ୍ୟେ ବୀଜଂ ନିୟୋଜୟେତ୍ ॥ ୭॥
ଶକ୍ତିଂ ବିନ୍ୟସ୍ୟ ପଦୟୋର୍ନାଭୌ ତୁ କୀଲକଂ ନ୍ୟସେତ୍ ।
ଦ୍ୱାତ୍ରିଂଶତ୍ତୁ ମହାବିଦ୍ୟାଃ ସାଙ୍ଖ୍ୟାୟନସଗୋତ୍ରଜାଃ ॥ ୮॥
ଦ୍ୱାଦଶଲକ୍ଷସଂୟୁକ୍ତା ବିନିୟୋଗାଃ ପୃଥକ୍ପୃଥକ୍ ।
ଏବଂ ନ୍ୟାସବିଧିଂ କୃତ୍ୱା କରାଙ୍ଗଂ ବିଧିପୂର୍ୱକମ୍ ॥ ୯॥
ବ୍ୟାହୃତିତ୍ରୟମୁଚ୍ଚାର୍ୟ ହ୍ୟନୁଲୋମବିଲୋମତଃ ।
ଚତୁରକ୍ଷରସଂୟୁକ୍ତଂ କରାଙ୍ଗନ୍ୟାସମାଚରେତ୍ ॥ ୧୦॥
ଆବାହନାଦିଭେଦଂ ଚ ଦଶ ମୁଦ୍ରାଃ ପ୍ରଦର୍ଶୟେତ୍ ।
ସା ପାତୁ ବରଦା ଦେବୀ ଅଙ୍ଗପ୍ରତ୍ୟଙ୍ଗସଙ୍ଗମେ ॥ ୧୧॥
ଧ୍ୟାନଂ ମୁଦ୍ରାଂ ନମସ୍କାରଂ ଗୁରୁମନ୍ତ୍ରଂ ତଥୈବ ଚ ।
ସଂୟୋଗମାତ୍ମସିଦ୍ଧିଂ ଚ ଷଡ୍ୱିଧଂ କିଂ ବିଚାରୟେତ୍ ॥ ୧୨॥
ଅସ୍ୟ ଶ୍ରୀଗାୟତ୍ରୀକବଚସ୍ୟ ବ୍ରହ୍ମବିଷ୍ଣୁରୁଦ୍ରା ଋଷୟଃ,
ଋଗ୍ୟଜୁଃସାମାଧର୍ୱାଣି ଛନ୍ଦାଂସି, ପରବ୍ରହ୍ମସ୍ୱରୂପିଣୀ
ଗାୟତ୍ରୀ ଦେବତା, ଭୂର୍ବୀଜଂ, ଭୁବଃ ଶକ୍ତିଃ, ସ୍ୱାହା କୀଲକଂ,
ଶ୍ରୀଗାୟତ୍ରୀପ୍ରୀତ୍ୟର୍ଥେ ଜପେ ବିନିୟୋଗଃ ॥
ଓଁ ଭୂର୍ଭୁବଃ ସ୍ୱଃ ତତ୍ସବିତୁରିତି ହୃଦୟାୟ ନମଃ ।
ଓଁ ଭୂର୍ଭୁବଃ ସ୍ୱଃ ବରେଣ୍ୟମିତି ଶିରସେ ସ୍ୱାହା ।
ଓଁ ଭୂର୍ଭୁବଃ ସ୍ୱଃ ଭର୍ଗୋ ଦେବସ୍ୟେତି ଶିଖାୟୈ ବଷଟ୍ ।
ଓଁ ଭୂର୍ଭୁବଃ ସ୍ୱଃ ଧୀମହୀତି କବଚାୟ ହୁମ୍ ।
ଓଁ ଭୂର୍ଭୁବଃ ସ୍ୱଃ ଧିୟୋ ଯୋ ନଃ ଇତି ନେତ୍ରତ୍ରୟାୟ ବୌଷଟ୍ ।
ଓଁ ଭୂର୍ଭୁବଃ ସ୍ୱଃ ପ୍ରଚୋଦୟାଦିତି ଅସ୍ତ୍ରାୟ ଫଟ୍ ॥
ବର୍ଣାସ୍ତ୍ରାଂ କୁଣ୍ଡିକାହସ୍ତାଂ ଶୁଦ୍ଧନିର୍ମଲଜ୍ୟୋତିଷୀମ୍ମ୍ ।
ସର୍ୱତତ୍ତ୍ୱମୟୀଂ ବନ୍ଦେ ଗାୟତ୍ରୀଂ ବେଦମାତରମ୍ ॥ ୧୩॥
ଅଥ ଧ୍ୟାନମ୍ ।
ମୁକ୍ତା ବିଦ୍ରୁମହେମନୀଲଧବଲଚ୍ଛାୟୈର୍ମୁଖୈସ୍ତ୍ରୀକ୍ଷଣୈ-
ର୍ୟୁକ୍ତାମିନ୍ଦୁନିବଦ୍ଧରତ୍ନମୁକୁଟାଂ ତତ୍ତ୍ୱାର୍ଥବର୍ଣାତ୍ମିକାମ୍ ।
ଗାୟତ୍ରୀଂ ବରଦାଭୟାଙ୍କୁଶକଶାଂ ଶୂଲଂ କପାଲଂ ଗୁଣଂ
ଶଙ୍ଖଂ ଚକ୍ରମଥାରବିନ୍ଦୟୁଗଲଂ ହସ୍ତୈର୍ୱହନ୍ତୀଂ ଭଜେ ॥ ୧୪॥
ଓଁ ଗାୟତ୍ରୀ ପୂର୍ୱତଃ ପାତୁ ସାବିତ୍ରୀ ପାତୁ ଦକ୍ଷିଣେ ।
ବ୍ରହ୍ମବିଦ୍ୟା ଚ ମେ ପଶ୍ଚାଦୁତ୍ତରେ ମାଂ ସରସ୍ୱତୀ ॥ ୧୫॥
ପାବକୀ ମେ ଦିଶଂ ରକ୍ଷେତ୍ପାବକୋଜ୍ଜ୍ୱଲଶାଲିନୀ ।
ଯାତୁଧାନୀଂ ଦିଶଂ ରକ୍ଷେଦ୍ୟାତୁଧାନଗଣାର୍ଦିନୀ ॥ ୧୬॥
ପାବମାନୀଂ ଦିଶଂ ରକ୍ଷେତ୍ପବମାନବିଲାସିନୀ ।
ଦିଶଂ ରୌଦ୍ରୀମବତୁ ମେ ରୁଦ୍ରାଣୀ ରୁଦ୍ରରୂପିଣୀ ॥ ୧୭॥
ଊର୍ଧ୍ୱଂ ବ୍ରହ୍ମାଣୀ ମେ ରକ୍ଷେଦଧସ୍ତାଦ୍ୱୈଷ୍ଣବୀ ତଥା ।
ଏବଂ ଦଶ ଦିଶୋ ରକ୍ଷେତ୍ ସର୍ୱତୋ ଭୁବନେଶ୍ୱରୀ ॥ ୧୮॥
ବ୍ରହ୍ମାସ୍ତ୍ରସ୍ମରଣାଦେବ ବାଚାଂ ସିଦ୍ଧିଃ ପ୍ରଜାୟତେ ।
ବ୍ରହ୍ମଦଣ୍ଡଶ୍ଚ ମେ ପାତୁ ସର୍ୱଶସ୍ତ୍ରାସ୍ତ୍ରଭକ୍ଷକ୍ରଃ ॥ ୧୯॥
ବ୍ରହ୍ମଶୀର୍ଷସ୍ତଥା ପାତୁ ଶତ୍ରୂଣାଂ ବଧକାରକଃ ।
ସପ୍ତ ବ୍ୟାହୃତୟଃ ପାନ୍ତୁ ସର୍ୱଦା ବିନ୍ଦୁସଂୟୁତାଃ ॥ ୨୦॥
ବେଦମାତା ଚ ମାଂ ପାତୁ ସରହସ୍ୟା ସଦୈବତା ।
ଦେବୀସୂକ୍ତଂ ସଦା ପାତୁ ସହସ୍ରାକ୍ଷରଦେବତା ॥ ୨୧॥
ଚତୁଃଷଷ୍ଟିକଲା ବିଦ୍ୟା ଦିବ୍ୟାଦ୍ୟା ପାତୁ ଦେବତା ।
ବୀଜଶକ୍ତିଶ୍ଚ ମେ ପାତୁ ପାତୁ ବିକ୍ରମଦେବତା ॥ ୨୨॥
ତତ୍ପଦଂ ପାତୁ ମେ ପାଦୌ ଜଙ୍ଘେ ମେ ସବିତୁଃପଦମ୍ ।
ବରେଣ୍ୟଂ କଟିଦେଶଂ ତୁ ନାଭିଂ ଭର୍ଗସ୍ତଥୈବ ଚ ॥ ୫୩॥
ଦେବସ୍ୟ ମେ ତୁ ହୃଦୟଂ ଧୀମହୀତି ଗଲଂ ତଥା ।
ଧିୟୋ ମେ ପାତୁ ଜିହ୍ୱାୟାଂ ଯଃପଦଂ ପାତୁ ଲୋଚନେ ॥ ୨୪॥
ଲଲାଟେ ନଃ ପଦଂ ପାତୁ ମୂର୍ଧାନଂ ମେ ପ୍ରଚୋଦୟାତ୍ ।
ତଦ୍ୱର୍ଣଃ ପାତୁ ମୂର୍ଧାନଂ ସକାରଃ ପାତୁ ଭାଲକମ୍ ॥ ୨୫॥
ଚକ୍ଷୁଷୀ ମେ ବିକାରସ୍ତୁ ଶ୍ରୋତ୍ରଂ ରକ୍ଷେତ୍ତୁ କାରକଃ ।
ନାସାପୁଟେର୍ୱକାରୋ ମେ ରେକାରସ୍ତୁ କପୋଲୟୋଃ ॥ ୨୬॥
ଣିକାରସ୍ତ୍ୱଧରୋଷ୍ଠେ ଚ ଯକାରସ୍ତୂର୍ଧ୍ୱ ଓଷ୍ଠକେ ।
ଆତ୍ୟମଧ୍ୟେ ଭକାରସ୍ତୁ ଗୋକାରସ୍ତୁ କପୋଲୟୋଃ ॥ ୨୭॥
ଦେକାରଃ କଣ୍ଠଦେଶେ ଚ ବକାରଃ ସ୍କନ୍ଧଦେଶୟୋଃ ।
ସ୍ୟକାରୋ ଦକ୍ଷିଣଂ ହସ୍ତଂ ଧୀକାରୋ ବାମହସ୍ତକମ୍ ॥ ୨୮॥
ମକାରୋ ହୃଦୟଂ ରକ୍ଷେଦ୍ଧିକାରୋ ଜଠରଂ ତଥା ।
ଧିକାରୋ ନାଭିଦେଶଂ ତୁ ଯୋକାରସ୍ତୁ କଟିଦ୍ୱୟମ୍ ॥ ୨୯॥
ଗୁହ୍ୟଂ ରକ୍ଷତୁ ଯୋକାର ଊରୂ ମେ ନଃ ପଦାକ୍ଷରମ୍ ।
ପ୍ରକାରୋ ଜାନୁନୀ ରକ୍ଷେଚ୍ଚୋକାରୋ ଜଙ୍ଘଦେଶୟୋଃ ॥ ୩୦॥
ଦକାରୋ ଗୁଲ୍ଭଦେଶଂ ତୁ ଯାତ୍କାରଃ ପାଦୟୁଗ୍ମକମ୍ ।
ଜାତବେଦେତି ଗାୟତ୍ରୀ ତ୍ର୍ୟମ୍ବକେତି ଦଶାକ୍ଷରା ॥ ୩୧॥
ସର୍ୱତଃ ସର୍ୱଦା ପାତୁ ଆପୋଜ୍ୟୋତୀତି ଷୋଡଶୀ ।
ଇଦଂ ତୁ କବଚଂ ଦିବ୍ୟଂ ବାଧାଶତବିନାଶକମ୍ ॥ ୩୨॥
ଚତୁଃଷଷ୍ଠିକଲାବିଦ୍ୟାସକଲୈଶ୍ୱର୍ୟସିଦ୍ଧିଦମ୍ ।
ଜପାରମ୍ଭେ ଚ ହୃଦୟଂ ଜପାନ୍ତେ କବଚଂ ପଠେତ୍ ॥ ୩୩॥
ସ୍ତ୍ରୀଗୋବ୍ରାହ୍ମଣମିତ୍ରାଦିଦ୍ରୋହାଦ୍ୟଖିଲପାତକୈଃ ।
ମୁଚ୍ୟତେ ସର୍ୱପାପେଭ୍ୟଃ ପରଂ ବ୍ରହ୍ମାଧିଗଚ୍ଛତି ॥ ୩୪॥
ପୁଷ୍ପାଞ୍ଜଲିଂ ଚ ଗାୟତ୍ର୍ୟା ମୂଲେନୈବ ପଠେତ୍ସକୃତ୍ ।
ଶତସାହସ୍ରବର୍ଷାଣାଂ ପୂଜାୟାଃ ଫଲମାପ୍ନୁୟାତ୍ ॥ ୩୫॥
ଭୂର୍ଜପତ୍ରେ ଲିଖିତ୍ୱୈତତ୍ ସ୍ୱକଣ୍ଠେ ଧାରୟେଦ୍ୟଦି ।
ଶିଖାୟାଂ ଦକ୍ଷିଣେ ବାହୌ କଣ୍ଠେ ବା ଧାରୟେଦ୍ବୁଧଃ ॥ ୩୬॥
ତ୍ରୈଲୋକ୍ୟଂ କ୍ଷୋଭୟେତ୍ସର୍ୱଂ ତ୍ରୈଲୋକ୍ୟଂ ଦହତି କ୍ଷଣାତ୍ ।
ପୁତ୍ରବାନ୍ ଧନବାନ୍ ଶ୍ରୀମାନ୍ନାନାବିଦ୍ୟାନିଧିର୍ଭବେତ୍ ॥ ୩୭॥
ବ୍ରହ୍ମାସ୍ତ୍ରାଦୀନି ସର୍ୱାଣି ତଦଙ୍ଗସ୍ପର୍ଶନାତ୍ତତଃ ।
ଭବନ୍ତି ତସ୍ୟ ତୁଚ୍ଛନି କିମନ୍ୟତ୍କଥୟାମି ତେ ॥ ୩୮॥
ଅଭିମନ୍ତ୍ରିତଗାୟତ୍ରୀକବଚଂ ମାନସଂ ପଠେତ୍ ।
ତଜ୍ଜଲଂ ପିବତୋ ନିତ୍ୟଂ ପୁରଶ୍ଚର୍ୟାଫଲଂ ଭବେତ୍ ॥ ୩୯॥
ଲଘୁସାମାନ୍ୟକଂ ମନ୍ତ୍ରଂ, ମହାମନ୍ତ୍ରଂ ତଥୈବ ଚ ।
ଯୋ ବେତ୍ତି ଧାରଣାଂ ଯୁଞ୍ଜନ୍, ଜୀବନ୍ମୁକ୍ତଃ ସ ଉଚ୍ୟତେ ॥ ୪୦॥
ସପ୍ତାବ୍ୟାହୃତିବିପ୍ରେନ୍ଦ୍ର ସପ୍ତାବସ୍ଥାଃ ପ୍ରକୀର୍ତିତାଃ ।
ସପ୍ତଜୀବଶତା ନିତ୍ୟଂ ବ୍ୟାହୃତୀ ଅଗ୍ନିରୂପିଣୀ ॥ ୪୧॥
ପ୍ରଣବେ ନିତ୍ୟଯୁକ୍ତସ୍ୟ ବ୍ୟାହୃତୀଷୁ ଚ ସପ୍ତସୁ ।
ସର୍ୱେଷାମେବ ପାପାନାଂ ସଙ୍କରେ ସମୁପସ୍ଥିତେ ॥ ୪୨॥
ଶତଂ ସହସ୍ରମଭ୍ୟର୍ଚ୍ୟ ଗାୟତ୍ରୀ ପାବନଂ ମହତ୍ ।
ଦଶଶତମଷ୍ଟୋତ୍ତରଶତଂ ଗାୟତ୍ରୀ ପାବନଂ ମହତ୍ ॥ ୪୩॥
ଭକ୍ତିୟୁକ୍ତୋ ଭବେଦ୍ୱିପ୍ରଃ ସନ୍ଧ୍ୟାକର୍ମ ସମାଚରେତ୍ ।
କାଲେ କାଲେ ପ୍ରକର୍ତବ୍ୟଂ ସିଦ୍ଧିର୍ଭବତି ନାନ୍ୟଥା ॥ ୪୪।
ପ୍ରଣବଂ ପୂର୍ୱମୁଦ୍ଧୃତ୍ୟ ଭୂର୍ଭୁବସ୍ୱସ୍ତଥୈବ ଚ ।
ତୁର୍ୟଂ ସହୈବ ଗୟତ୍ରୀଜପ ଏବମୁଦାହୃତମ୍ ॥ ୪୫॥
ତୁରୀୟପାଦମୁତ୍ସୃଜ୍ୟ ଗାୟତ୍ରୀଂ ଚ ଜପେଦ୍ଦ୍ୱିଜଃ ।
ସ ମୂଢୋ ନରକଂ ଯାତି କାଲସୂତ୍ରମଧୋଗତିଃ ॥ ୪୬॥
ମନ୍ତ୍ରାଦୌ ଜନନଂ ପ୍ରୋକ୍ତଂ ମତ୍ରାନ୍ତେ ମୃତସୂତ୍ରକମ୍ ।
ଉଭୟୋର୍ଦୋଷନିର୍ମୁକ୍ତଂ ଗାୟତ୍ରୀ ସଫଲା ଭବେତ୍ ॥ ୪୭॥
ମତ୍ରାଦୌ ପାଶବୀଜଂ ଚ ମନ୍ତ୍ରାନ୍ତେ କୁଶବୀଜକମ୍ ।
ମନ୍ତ୍ରମଧ୍ୟେ ତୁ ଯା ମାୟା ଗାୟତ୍ରୀ ସଫଲା ଭବେତ୍ ॥ ୪୮॥
ବାଚିକସ୍ତ୍ୱହମେବ ସ୍ୟାଦୁପାଂଶୁ ଶତମୁଚ୍ୟତେ ।
ସହସ୍ରଂ ମାନସଂ ପ୍ରୋକ୍ତଂ ତ୍ରିବିଧଂ ଜପଲକ୍ଷଣମ୍ ॥ ୪୯॥
ଅକ୍ଷମାଲାଂ ଚ ମୁଦ୍ରାଂ ଚ ଗୁରୋରପି ନ ଦର୍ଶୟେତ୍ ।
ଜପଂ ଚାକ୍ଷସ୍ୱରୂଭେଣାନାମିକାମଧ୍ୟପର୍ୱଣି ॥ ୫୦॥
ଅନାମା ମଧ୍ୟଯା ହୀନା କନିଷ୍ଠାଦିକ୍ରମେଣ ତୁ ।
ତର୍ଜନୀମୂଲପର୍ୟନ୍ତଂ ଗାୟତ୍ରୀଜପଲକ୍ଷଣମ୍ ॥ ୫୧॥
ପର୍ୱଭିସ୍ତୁ ଜପେଦେବମନ୍ୟତ୍ର ନିୟମଃ ସ୍ମୃତଃ ।
ଗାୟତ୍ରୀ ବେଦମୂଲତ୍ୱାଦ୍ୱେଦଃ ପର୍ୱସୁ ଗୀୟତେ ॥ ୫୨॥
ଦଶଭିର୍ଜନ୍ମଜନିତଂ ଶତେନୈବ ପୁରା କୃତମ୍ ।
ତ୍ରିୟୁଗଂ ତୁ ସହସ୍ରାଣି ଗାୟତ୍ରୀ ହନ୍ତି କିଲ୍ବିଷମ୍ ॥ ୫୩॥
ପ୍ରାତଃକାଲେୟୁ କର୍ତବ୍ୟଂ ସିଦ୍ଧିଂ ବିପ୍ରୋ ଯ ଇଚ୍ଛତି ।
ନାଦାଲୟେ ସମାଧିଶ୍ଚ ସନ୍ଧ୍ୟାୟାଂ ସମୁପାସତେ ॥ ୫୪॥
ଅଙ୍ଗୁଲ୍ୟଗ୍ରେଣ ଯଜ୍ଜପ୍ତଂ ଯଜ୍ଜପ୍ତଂ ମେରୁଲଙ୍ଘନେ ।
ଅସଙ୍ଖ୍ୟଯା ଚ ଯଜ୍ଜପ୍ତଂ ତଜ୍ଜପ୍ତଂ ନିଷ୍ଫଲଂ ଭବେତ୍ ॥ ୫୫॥
ବିନା ବସ୍ତ୍ରଂ ପ୍ରକୁର୍ୱୀତ ଗାୟତ୍ରୀ ନିଷ୍ଫଲା ଭବେତ୍ ।
ବସ୍ତ୍ରପୁଚ୍ଛଂ ନ ଜାନାତି ବୃଥା ତସ୍ୟ ପରିଶ୍ରମଃ ॥ ୫୬॥
ଗାୟତ୍ରୀଂ ତୁ ପରିତ୍ୟଜ୍ୟ ଅନ୍ୟମନ୍ତ୍ରମୁପାସତେ ।
ସିଦ୍ଧାନ୍ନଂ ଚ ପରିତ୍ୟଜ୍ୟ ଭିକ୍ଷାମଟତି ଦୁର୍ମତିଃ ॥ ୫୭॥
ଋଷିଶ୍ଛନ୍ଦୋ ଦେବତାଖ୍ୟା ବୀଜଂ ଶକ୍ତିଶ୍ଚ କୀଲକମ୍ ।
ନିୟୋଗଂ ନ ଚ ଜାନାତି ଗାୟତ୍ରୀ ନିଷ୍ଫଲା ଭବେତ୍ ॥ ୫୮॥
ବର୍ଣମୁଦ୍ରାଧ୍ୟାନପଦମାବାହନବିସର୍ଜନମ୍ ।
ଦୀପଂ ଚକ୍ରଂ ନ ଜାନାତି ଗାୟତ୍ରୀ ନିଷଫଲା ଭବେତ୍ ॥ ୫୯॥
ଶକ୍ତିର୍ନ୍ୟାସସ୍ତଥା ସ୍ଥାନଂ ମନ୍ତ୍ରସମ୍ବୋଧନଂ ପରମ୍ ।
ତ୍ରିବିଧଂ ଯୋ ନ ଜାନାତି ଗାୟତ୍ରୀ ତସ୍ୟ ନିଷ୍ଫଲା ॥ ୬୦॥
ପଞ୍ଚୋପଚାରକାଂଶ୍ଚୈବ ହୋମଦ୍ରବ୍ୟଂ ତଥୈବ ଚ ।
ପଞ୍ଚାଙ୍ଗଂ ଚ ବିନା ନିତ୍ୟଂ ଗାୟତ୍ରୀ ନିଷ୍ଫଲା ଭବେତ୍ ॥ ୬୧॥
ମନ୍ତ୍ରସିଦ୍ଧିର୍ଭବେଜ୍ଜାତୁ ବିଶ୍ୱାମିତ୍ରେଣ ଭାଷିମ୍ ।
ବ୍ୟାସୋ ବାଚସ୍ପତିର୍ଜୀବସ୍ତୁତା ଦେବୀ ତପଃସ୍ମୃତୌ ॥ ୬୨॥
ସହସ୍ରଜପ୍ତା ସା ଦେବୀ ହ୍ୟୁପପାତକନାଶିନୀ ।
ଲକ୍ଷଜାପ୍ୟେ ତଥା ତଚ୍ଚ ମହାପାତକନାଶିନୀ ।
କୋଟିଜାପ୍ୟେନ ରାଜେନ୍ଦ୍ର ଯଦିଚ୍ଛତି ତଦାପ୍ନୁୟାତ୍ ॥ ୬୩॥
ନ ଦେୟଂ ପରଶିଷ୍ୟେଭ୍ୟୋ ହ୍ୟଭକ୍ତେଭ୍ୟୋ ବିଶେଷତଃ ।
ଶିଷ୍ୟେଭ୍ୟୋ ଭକ୍ତିୟୁକ୍ତେଭ୍ୟୋ ହ୍ୟନ୍ୟଥା ମୃତ୍ୟୁମାପ୍ନୁୟାତ୍ ॥ ୬୪॥
ଇତି ଶ୍ରୀମଦ୍ୱସିଷ୍ଠସଂହିତୋକ୍ତଂ ଗୟତ୍ରୀକବଚଂ ସମ୍ପୂର୍ଣମ୍ ॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
ଅଲଭ୍ୟ ଶ୍ରୀଗାୟତ୍ରୀକବଚମ୍ https://gayatree-upasana.blogspot.com/2022/10/blog-post_17.html
No comments:
Post a Comment