ଏକଦା ତୁ ମହାଦେବଂ କୈଲାଶଗିରିସଂସ୍ଥିତମ୍ ।
ପପ୍ରଚ୍ଛ ଦେବୀ ବନ୍ଦ୍ୟା ବିବୁଧମଣ୍ଡଲୈଃ ॥ ୧॥
କତମଂ ଯୋଗମାସୀନୋ ଯୋଗେଶ ତ୍ୱମୁପାସସେ ।
ଯେନ ହି ପରମାଂ ସିଦ୍ଧିଂ ପ୍ରାପ୍ନୁବାନ୍ ଜଗଦୀଶ୍ୱର ॥ ୨॥
ଶ୍ରୁତ୍ୱା ତୁ ପାର୍ୱତୀ ବାଚଂ ମଧୁସିକ୍ତାଂ ଶ୍ରୁତିପ୍ରିୟାମ୍ ।
ସମୁବାଚ ମହାଦେବୋ ବିଶ୍ୱକଲ୍ୟାଣକାରକଃ ॥ ୩॥
ମହଦ୍ରହସ୍ୟଂ ତଦ୍ଗୁପ୍ତଂ ଯତ୍ତୁ ପୃଷ୍ଟଂ ତ୍ୱୟା ପ୍ରିୟେ ।
ତଥାପି କଥୟିଷ୍ୟାମି ସ୍ନେହାତ୍ତତ୍ତ୍ୱାମହଂ ସମମ୍ ॥ ୪॥
ଗାୟତ୍ରୀ ବେଦ ମାତାସ୍ତି ସାଦ୍ୟା ଶକ୍ତିର୍ମତା ଭୁବି ।
ଜଗତାଂ ଜନନୀ ଚୈବ ତାମୁପାସେଽହମେବ ହି ॥ ୫॥
ଯୌଗିକାନାଂ ସମସ୍ତାନାଂ ସାଧନାନାଂ ତୁ ହେ ପ୍ରିୟେ ।
ଗାୟତ୍ର୍ୟେବ ମତା ଲୋକେ ମୂଲାଧାରୋ ବିଦାମ୍ବରୈଃ ॥ ୬॥
ଅତି ରହସ୍ୟମୟ୍ୟେଷା ଗାୟତ୍ରୀ ତୁ ଦଶ ଭୁଜା ।
ଲୋକେଽତି ରାଜତେ ପଞ୍ଚ ଧାରୟନ୍ତି ମୁଖାନି ତୁ ॥ ୭॥
ଅତି ଗୂଢାନି ସଂଶ୍ରୁତ୍ୟ ବଚନାନି ଶିବସ୍ୟ ଚ ।
ଅତି ସମ୍ବୃଦ୍ଧ ଜିଜ୍ଞାସା ଶିବମୂଚେ ତୁ ପାର୍ୱତୀ ॥ ୮॥
ପଞ୍ଚାସ୍ୟ ଦଶବାହୂନାମେତେଷାଂ ପ୍ରାଣବଲ୍ଲଭ ।
କୃତ୍ୱା କୃପାଂ କୃପାଲୋ ତ୍ୱଂ କିଂ ରହସ୍ୟଂ ତୁ ମେ ବଦ ॥ ୯॥
ଶ୍ରୁତ୍ୱା ତ୍ୱେତନ୍ମହାଦେବଃ ପାର୍ୱତୀବଚନଂ ମୃଦୁ ।
ତସ୍ୟାଃ ଶଙ୍କାମପାକୁର୍ୱନ୍ ପ୍ରତ୍ୟୁବାଚ ନିଜାଂ ପ୍ରିୟାମ୍ ॥ ୧୦॥
ଗାୟତ୍ର୍ୟାସ୍ତୁ ମହାଶକ୍ତିର୍ୱିଦ୍ୟତେ ଯା ହି ଭୂତଲେ ।
ଅନନ୍ୟ ଭାବତୋ ହ୍ୟସ୍ମିନ୍ନୋତପ୍ରୋତୋଽସ୍ତି ଚାତ୍ମନି ॥ ୧୧॥
ବିଭର୍ତି ପଞ୍ଚାବରଣାନ୍ ଜୀବଃ କୋଶାସ୍ତୁ ତେ ମତାଃ ।
ମୁଖାନି ପଞ୍ଚ ଗାୟତ୍ର୍ୟାସ୍ତାନେବ ବେଦ ପାର୍ୱତି ॥ ୧୨॥
ବିଜ୍ଞାନମୟାନ୍ନମୟ-ପ୍ରାଣମୟ-ମନୋମୟାଃ ।
ତଥାନନ୍ଦମୟଶ୍ଚୈବ ପଞ୍ଚ କୋଶାଃ ପ୍ରକୀର୍ତିତାଃ ॥ ୧୩॥
ଏଷ୍ୱେବ କୋଶକୋଶେଷୁ ହ୍ୟନନ୍ତା ଋଦ୍ଧି ସିଦ୍ଧୟଃ ।
ଗୁପ୍ତା ଆସାଦ୍ୟ ଯା ଜୀବୋ ଧନ୍ୟତ୍ୱମଧିଗଚ୍ଛତି ॥ ୧୪॥
ଯସ୍ତୁ ଯୋଗୀଶ୍ୱରୋ ହ୍ୟେତାନ୍ ପଞ୍ଚ କୋଶାନ୍ନୁ ବେଧତେ ।
ସ ଭବସାଗରଂ ତୀର୍ତ୍ୱା ବନ୍ଧନେଭ୍ୟୋ ବିମୁଚ୍ୟତେ ॥ ୧୫॥
ଗୁପ୍ତଂ ରହସ୍ୟମେତେଷାଂ କୋଷାଣାଂ ଯୋଽବଗଚ୍ଛତି ।
ପରମାଂ ଗତିମାପ୍ନୋତି ସ ଏବ ନାତ୍ର ସଂଶୟଃ ॥ ୧୬॥
ଲୋକାନାଂ ତୁ ଶରୀରାଣି ହ୍ୟନ୍ନାଦେବ ଭବନ୍ତି ନୁ ।
ଉପତ୍ୟକାସୁ ସ୍ୱାସ୍ଥ୍ୟଂ ଚ ନିର୍ଭରଂ ବର୍ତତେ ସଦା ॥ ୧୭॥
ଆସନେନୋପବାସେନ ତତ୍ତ୍ୱ ଶୁଦ୍ଧ୍ୟା ତପସ୍ୟଯା ।
ଚୈବାନ୍ନମୟକୋଶସ୍ୟ ସଂଶୁଦ୍ଧିରଭିଜାୟତେ ॥ ୧୮॥
ଐଶ୍ୱର୍ୟଂ ପୁରୁଷାର୍ଥଶ୍ଚ ତେଜ ଓଜୋ ଯଶସ୍ତଥା ।
ପ୍ରାଣଶକ୍ତ୍ୟା ତୁ ବର୍ଧନ୍ତେ ଲୋକାନାମିତ୍ୟସଂଶୟମ୍ ॥ ୧୯॥
ପଞ୍ଚଭିସ୍ତୁ ମହାପ୍ରାଣୈର୍ଲଘୁପ୍ରାଣୈଶ୍ଚ ପଞ୍ଚଭିଃ ।
ଏତୈଃ ପ୍ରାଣମୟଃ କୋଶୋ ଜାତୋ ଦଶଭିରୁତ୍ତମଃ ॥ ୨୦॥
ବନ୍ଧେନ ମୁଦ୍ରୟା ଚୈବ ପ୍ରାଣାୟାମେନ ଚୈବ ହି ।
ଏଷ ପ୍ରାଣମୟଃ କୋଶୋ ଯତମାନଂ ତୁ ସିଦ୍ଧ୍ୟତି ॥ ୨୧॥
ଚେତନାୟା ହି କେନ୍ଦ୍ରନ୍ତୁ ମନୁଷ୍ୟାଣାଂ ମନୋମତମ୍ ।
ଜାୟତେ ମହତୀତ୍ୱନ୍ତଃ ଶକ୍ତିସ୍ତସ୍ମିନ୍ ବଶଙ୍ଗତେ ॥ ୨୨॥
ଧ୍ୟାନ-ତ୍ରାଟକ-ତନ୍ମାତ୍ରା ଜପାନାଂ ସାଧନୈର୍ନନୁ ।
ଭବତ୍ୟୁଜ୍ଜ୍ୱଲଃ କୋଶଃ ପାର୍ୱତ୍ୟେଷ ମନୋମୟଃ ॥ ୨୩॥
ଯଥାବତ୍ ପୂର୍ଣତୋ ଜ୍ଞାନଂ ସଂସାରସ୍ୟ ଚ ସ୍ୱସ୍ୟ ଚ ।
ନୂନମିତ୍ୟେବ ବିଜ୍ଞାନଂ ପ୍ରୋକ୍ତଂ ବିଜ୍ଞାନବେତ୍ତୃଭିଃ ॥ ୨୪॥
ସାଧନା ସୋଽହମିତ୍ୟେଷା ତଥା ବାତ୍ମାନୁଭୂତୟଃ ।
ସ୍ୱରାଣାଂ ସଂୟମଶ୍ଚୈବ ଗ୍ରନ୍ଥିଭେଦସ୍ତଥୈବ ଚ ॥ ୨୫॥
ଏଷାଂ ସଂସିଦ୍ଧିଭିର୍ନୂନଂ ଯତମାନସ୍ୟ ହ୍ୟାତ୍ମନି ।
ନୁ ବିଜ୍ଞାନମୟଃ କୋଶଃ ପ୍ରିୟେ ଯାତି ପ୍ରବୁଦ୍ଧତାମ୍ ॥ ୨୬॥
ଆନନ୍ଦାବରଣୋନ୍ନତ୍ୟାତ୍ୟନ୍ତଶାନ୍ତି-ପ୍ରଦାୟିକା ।
ତୁରୀୟାବସ୍ଥିତିର୍ଲୋକେ ସାଧକଂ ତ୍ୱଧିଗଚ୍ଛତି ॥ ୨୭॥
ନାଦ ବିନ୍ଦୁ କଲାନାଂ ତୁ ପୂର୍ଣ ସାଧନୟା ଖଲୁ ।
ନନ୍ୱାନନ୍ଦମୟଃ କୋଶଃ ସାଧକେ ହି ପ୍ରବୁଦ୍ଧ୍ୟତେ ॥ ୨୮॥
ଭୂଲୋକସ୍ୟାସ୍ୟ ଗାୟତ୍ରୀ କାମଧେନୁର୍ମତା ବୁଧୈଃ ।
ଲୋକ ଆଶ୍ରୟଣେନାମୂଂ ସର୍ୱମେବାଧିଗଚ୍ଛତି ॥ ୨୯॥
ପଞ୍ଚାସ୍ୟା ଯାସ୍ତୁ ଗାୟତ୍ର୍ୟାଃ ବିଦ୍ୟାଂ ଯସ୍ତ୍ୱବଗଚ୍ଛତି ।
ପଞ୍ଚତତ୍ତ୍ୱ ପ୍ରପଞ୍ଚାତ୍ତୁ ସ ନୂନଂ ହି ପ୍ରମୁଚ୍ୟତେ ॥ ୩୦॥
ଦଶଭୁଜାସ୍ତୁ ଗାୟତ୍ର୍ୟାଃ ପ୍ରସିଦ୍ଧା ଭୁବନେଷୁ ଯାଃ ।
ପଞ୍ଚ ଶୂଲ ମହାଶୂଲାନ୍ୟେତାଃ ସଙ୍କେତୟନ୍ତି ହି ॥ ୩୧॥
ଦଶଭୁଜାନ୍ନାମେତାସାଂ ଯୋ ରହସ୍ୟଂ ତୁ ବେତ୍ତି ଯଂ ସଃ ।
ତ୍ରାସଂ ଶୂଲମହାଶୂଲାନାଂ ନା ନୈବାବଗଚ୍ଛତି ॥ ୩୨॥
ଦୃଷ୍ଟିସ୍ତୁ ଦୋଷସଂୟୁକ୍ତା ପରେଷାମବଲମ୍ବନମ୍ ।
ଭୟଂ ଚ କ୍ଷୁଦ୍ରତାଽସାବଧାନତା ସ୍ୱାର୍ଥୟୁକ୍ତତା ॥ ୩୩॥
ଅବିବେକସ୍ତଥାବେଶସ୍ତୃଷ୍ଣାଲସ୍ୟଂ ତଥୈବ ଚ
ଏତାନି ଦଶ ଶୂଲାନି ଶୂଲଦାନି ଭବନ୍ତି ହି ॥ ୩୪॥
ନିଜୈର୍ଦଶଭୁଜୈର୍ନୂନଂ ଶୂଲାନ୍ୟେତାନି ତୁ ଦଶ ।
ସଂହରତେ ହି ଗାୟତ୍ରୀ ଲୋକକଲ୍ୟାଣକାରିଣୀ ॥ ୩୫॥
କଲୌ ଯୁଗେ ମନୁଷ୍ୟାଣାଂ ଶରୀରାଣୀତି ପାର୍ୱତି ।
ପୃଥ୍ୱୀ ତତ୍ତ୍ୱ ପ୍ରଧାନାନି ଜାନାସ୍ୟେବ ଭବନ୍ତି ହି ॥ ୩୬॥
ସୂକ୍ଷ୍ମତତ୍ତ୍ୱ ପ୍ରଧାନାନ୍ୟଯୁଗୋଦ୍ଭୂତ ନୃଣାମତଃ ।
ସିଦ୍ଧୀନାଂ ତପସାମେତେ ନ ଭବନ୍ତ୍ୟଧିକାରିଣଃ ॥ ୩୭॥
ପଞ୍ଚାଙ୍ଗ ଯୋଗ ସଂସିଦ୍ଧ୍ୟା ଗାୟତ୍ର୍ୟାସ୍ତୁ ତଥାପି ତେ ।
ତଦ୍ୟୁଗାନାଂ ସର୍ୱଶ୍ରେଷ୍ଠାଂ ସିଦ୍ଧିଂ ସମ୍ପ୍ରାପ୍ନୁବନ୍ତି ହି ॥ ୩୮॥
ଗାୟତ୍ର୍ୟା ବାମମାର୍ଗୀୟଂ ଜ୍ଞେୟମତ୍ୟୁଚ୍ଚସାଧକୈଃ ।
ଉଗ୍ରଂ ପ୍ରଚଣ୍ଡମତ୍ୟନ୍ତଂ ବର୍ତତେ ତନ୍ତ୍ର ସାଧନମ୍ ॥ ୩୯॥
ଅତ ଏବ ତୁ ତଦ୍ଗୁପ୍ତଂ ରକ୍ଷିତଂ ହି ବିଚକ୍ଷଣୈଃ ।
ସ୍ୟାଦ୍ୟତୋ ଦୁରୁପୟୋଗୋ ନ କୁପାତ୍ରୈଃ କଥଞ୍ଚନ ॥ ୪୦॥
ଗୁରୁଣୈବ ପ୍ରିୟେ ବିଦ୍ୟା ତତ୍ତ୍ୱଂ ହୃଦି ପ୍ରକାଶ୍ୟତେ ।
ଗୁରୁଂ ବିନା ତୁ ସା ବିଦ୍ୟା ସର୍ୱଥା ନିଷ୍ଫଲା ଭବେତ୍ ॥ ୪୧॥
ଗାୟତ୍ରୀ ତୁ ପରାବିଦ୍ୟା ତତ୍ଫଲାବାପ୍ତୟେ ଗୁରୁଃ ।
ସାଧକେନ ବିଧାତବ୍ୟୋ ଗାୟତ୍ରୀ-ତତ୍ତ୍ୱ ପଣ୍ଡିତଃ ॥ ୪୨॥
ଗାୟତ୍ରୀଂ ଯୋ ବିଜାନାତି ସର୍ୱଂ ଜାନାତି ସ ନନୁ ।
ଜାନାତୀମାଂ ନ ଯସ୍ତସ୍ୟ ସର୍ୱା ବିଦ୍ୟାସ୍ତୁ ନିଷ୍ଫଲାଃ ॥ ୪୩॥
ଗାୟତ୍ର୍ୟେବତପୋ ଯୋଗଃ ସାଧନଂ ଧ୍ୟାନମୁଚ୍ୟତେ ।
ସିଦ୍ଧୀନାଂ ସା ମତା ମାତା ନାତଃ କିଞ୍ଚିତ୍ ବୃହତ୍ତରମ୍ ॥ ୪୪॥
ଗାୟତ୍ରୀ ସାଧନା ଲୋକେ ନ କସ୍ୟାପି କଦାପି ହି ।
ଯାତି ନିଷ୍ଫଲତାମେତତ୍ ଧ୍ରୁବଂ ସତ୍ୟଂ ହି ଭୂତଲେ ॥ ୪୫॥
ଗୁପ୍ତମୁକ୍ତଂ ରହସ୍ୟଂ ଯତ୍ ପାର୍ୱତି ତ୍ୱାଂ ପତିବ୍ରତାମ୍ ।
ପ୍ରାପ୍ସ୍ୟନ୍ତି ପରମାଂ ସିଦ୍ଧିଂ ଜ୍ଞାସ୍ୟନ୍ତ୍ୟେତତ୍ ତୁ ଯେ ଜନାଃ ॥ ୪୬॥
॥ ଇତି ॥
ଗାୟତ୍ରୀ ଆବାହନ
ଗାୟତ୍ରୀ ମନ୍ତ୍ର ଆହୁତି
ଗାୟତ୍ରୀ ଆରତୀ
https://youtube.com/playlist?list=PLk9rZGFktJbNmccpBqvmo9jFtZwm5dJgU&feature=shared
ଶ୍ରୀ ଗାୟତ୍ରୀ ଚାଲୀସା https://gayatree-upasana.blogspot.com/2022/10/blog-post_16.html
No comments:
Post a Comment